नागपूर : महाराष्ट्र पोलिस आयुक्‍ताद्वारे पोलिस शिपाईपदाच्या 271 जागा नागपूर शहरासाठी काढण्यात आल्या. परंतु, नागपूर शहरात ओबीसी व एस.सी. प्रवर्गाला एकही जागा दिलेली नाही. पदभरतीत 19 व 13 टक्‍के आरक्षणाचे उल्लंघन करण्यात आले आहे. यामुळे संतप्त झालेल्या राष्ट्रीय ओबीसी विद्यार्थी महासंघाद्वारे शनिवारी (ता. 14) दुपारी 12 वाजता संविधान चौकात निदर्शने करण्यात आली.
पोलिस भरतीत ओबीसींना नागपूर, भंडारा, ठाणे, रत्नागिरी, जालना व गोंदिया या जिल्ह्यांत एकही जागा दिलेली नाही. तसेच महाराष्ट्र राज्य आरक्षण धोरणाचे उल्लंघन करण्यात आले आहे. एस. सी. समाजालासुद्धा 13 टक्‍के आरक्षण असतानाही एकही जागा दिलेली नाही. सरकारने लवकरात लवकर ही जाहिरात रद्द करून ओबीसी समाजाला 19 व एस.सी. समाजाला 13 टक्‍के आरक्षण द्यावे. अन्यथा आमदार, खासदारांच्या घरासमोर ढोल बजाओ आंदोलन करून झोपल्याचे सोंग घेतलेल्यांना जागे केले जाईल, असा इशारा आंदोलकांनी दिला. आंदोलकांना राष्ट्रीय ओबीसी महासंघाचे राष्ट्रीय अध्यक्ष डॉ. बबनराव तायवाडे यांनी मार्गदर्शन केले.