वर्धा : चंद्रपूर महामार्गावर स्थानिक गुन्हे शाखेचे पोलिस गस्तीवर असताना जाम चौरस्ता येथे एका व्यक्तीची संशयावरून तपासणी केली असता त्याच्याकडे असलेल्या थैलीत मोठ्या प्रमाणात गांजा मिळून आला. या व्यक्तीचे नाव फिरोज खान चांद खान (वय ३६) रा. टट्टीगुडा, आदिलाबाद (तेलंगणा) ह.मु. जाम असे असल्याचे सांगण्यात आले.

त्याची झडती घेतली असता पोलिसांना त्याच्याकडून १० हजार रुपयांचा गांजा मिळून आला. त्याचे वजन दोन किलो ४५ ग्रॅम असल्याचे पोलिसांकडून सांगण्यात आले आहे. या कारवाईत पोलिसांनी दुचाकीसह ९० रुपयांचा मुद्देमाल जप्त करण्यात आला आहे. या प्रकरणी कारवाई करून आरोपाली समुद्रपूर पोलिसांच्या स्वाधीन करण्यात आले आहे.

स्थानिक गुन्हे शाखेचे पोलिस गस्तीवर असताना जाम येथील हिंगणघाट रोडवरील 'सबका मालिक एक' या पानठेल्या समोर एका व्यक्तीकडे गांजा असल्याची माहिती मिळाली. यावरून कारवाई करीत आरोपीला अटक करण्यात आली. ही कारवाई स्थानिक गुन्हेशाखेचे पोलिस निरीक्षक संजय गायकवाड यांचे मार्गदर्शनात पोलिस उपनिरीक्षक गोपाल ढोले, हवालदार निरंजन वरभे, नरेंद्र डहाके, रंजीत काकडे, राजेश तिवस्कर, प्रमोद पिसे, श्रीकांत खडसे, रामकिसन इप्पर, पवन पन्नासे, चालक मुकेश यांनी केली.