चांदूररेल्वे - मागील अनेक दिवसांपासून निवडणुकीवर बहिष्कार टाकण्याचा इशारा देणारे किरजवळा येथील नागरिक आज निवडणुकीच्या दिवशी आपल्या निर्णयावर ठाम राहिले. गावात केवळ नऊ मतदारांनी मतदानाचा हक्क बजवला.

अनेक दिवसांपासून कुक्कूटपालन व्यवसायींच्या कोंबड्यांच्या विष्ठेसंदर्भात अनेकदा तक्रारी केल्या, आंदोलन केले, परंतु कुठल्याही प्रकारचा न्याय नागरिकांना मिळाला नसल्याने गावकऱ्यांनी निवडणुकीवर बहिष्कार टाकला. किरजवळा गावात एकूण ५२६ मतदार आहेत, मतदान करणाऱ्यांमध्ये अंगणवाडी सेविका, मदतनीस, कोतवाल आणि पोलिस पाटील यांचा समावेश आहे.

चांदूररेल्वे तालुक्यातील किरजवळा येथील गावालगत कुक्कूटपालन व्यावसायिक निघालेली विष्ठा गावाच्या बाजूला आणून टाकत असल्यामुळे गावात दुर्गंधी पसरली आहे. त्यामुळे गावातील नागरिकांना याचा त्रास होत होता, त्यामुळेच कोंबड्यांचा विष्ठेच्या दुर्गंधीमुळे अनेक नागरिकांना आजाराचा त्रास झालेला आहे. अनेकदा प्रशासनाकडे याबाबत पाठपुरावा केला. आंदोलने सुद्धा केली. तरीही प्रशासनाने गंभीर भूमिका घेतली नाही.

त्यामुळेच गावातील नागरिकांनी लोकसभा निवडणुकीवर बहिष्कार टाकण्याचा इशारा चांदूररेल्वेचे उपविभागीय अधिकारी व निवडणूक निर्णय अधिकारी यांना निवेदनाद्वारे दिला होता. परंतु हे प्रकरण न्यायालयात दाखल असल्यामुळे प्रशासन यावर काही तोडगा काढू शकले नसल्याची माहिती आहे.