सडक अर्जुनी (गोंदिया)  : कनेरीजवळच्या नाल्यात प्रेमीयुगुलांनी आत्महत्या केल्याची घटना मंगळवारी (ता. 17) सकाळी साडेसातच्या सुमारास उघडकीस आली. संदीप यशवंत कावळे (वय 23) व संगीता शत्रुघ्न बोहारे (वय 16) अशी या प्रेमीयुगुलांची नावे असून, दोघेही कनेरी राम येथील रहिवासी आहेत.
मंगळवारी सकाळी कनेरी येथील एक शेतकरी शेतात गेले होते. दुर्गंधी आल्याने त्यांनी गावात येऊन सांगितले. तसेच डुग्गीपार पोलिसांना माहिती देण्यात आली. ठाणेदार विजय पवार यांनी तत्काळ घटनास्थळ गाठून पंचनामा केला. दोन्ही मृतदेह कुजलेल्या अवस्थेत असल्याने सुरुवातीला ओळख पटविणे कठीण झाले होते.
दरम्यान, कनेरी येथील संगीता बोहारे ही बेपत्ता असल्याची तक्रार तिच्या कुटुंबीयांनी 4 सप्टेंबरला पोलिसांत दिली होती. या तक्रारीची नोंद घेतल्याची माहिती ठाणेदार पवार यांनी दिली. दरम्यान, उशिरापर्यंत ओळख पटविण्याचे काम सुरू असताना अखेर दोन्ही मृतांची ओळख पटली. दोघांचेही मृतदेह कुजलेल्या अवस्थेत असल्याने जागीच शवविच्छेदन करण्यात आले.
घटनास्थळी अतिरिक्त पोलिस अधीक्षक कुलकर्णी, उपविभागीय पोलिस अधिकारी प्रशांत ढोले, स्थानिक गुन्हे शाखा गोंदिया येथील पोलिस निरीक्षक खोसरे यांच्यासह मृतांचे नातेवाईक उपस्थित होते. तपास पोलिस उपनिरीक्षक सोळंके करीत आहेत.