नागपूर : दहा रुपयांत गोरगरिबांना जेवण देण्याचे वचन शिवसेनेने पाळला आहे. येत्या काळात गोरगरिबांना दहा रुपयांत शिवभोजन मिळणार आहे. याबाबतची घोषणा मुख्यमंत्री उद्धव ठाकरे यांनी शनिवारी (ता. 21) विधानसभेत केली. विशेष म्हणजे, शिवसेनेने निवडणुकीच्या वचननाम्यात याबाबत उल्लेख केला होता. 

ब्रेकिंग - शेतकऱ्यांसाठी खुशखबर, दोन लाखांपर्यंतचे कर्ज माफ होणार

हिवाळी अधिवेशनाच्या पहिल्या दिवसापासून विरोधकांनी शेतकऱ्यांचा सातबारा कोरा करून अवकाळी पावसाने नुकसान झालेल्या शेतकऱ्यांना हेक्‍टरी 25 हजार रुपये मदत देण्याची मागणी लावून धरली होती. यावरून सभागृहात आणि सभागृहाबाहेर देखील घोषणाबाजी करण्यात आली होती. शेतकऱ्यांचा मुद्यावरून विरोधकांनी संपूर्ण अधिवेशन काळात धारेवर धरण्याचा प्रयत्न केल होता. अखेर अधिवेशनाच्या शेवटच्या दिवशी राज्य सरकारने राज्यातील शेतकऱ्यांचे कर्ज माफ करण्याचा निर्णय घेतला आहे. 

मुख्यमंत्र्यांनी सभागृहात कर्जमाफीची घोषणा केल्यानंतर विरोधी पक्षनेत देवेंद्र फडणवीस यांनी आक्षेप घेतला. सरकारने दिलेला शब्द पाळला नाही. शेतकऱ्यांचा सातबारा कोरा करण्याचे वचन उद्धव ठाकरे यांनी दिले होते. तसेच अवकाळी पावसामुळे नुकसान झालेल्या शेतकऱ्यांना हेक्‍टरी 25 हजार रुपये मदत देणार असल्याचेही त्यांनी सांगितले होते. त्यानुसार हे सरकार शब्दाला जागले नाही. यामुळे शेतकऱ्यांचा तोंडाला पाने पुसल्याचा आरोप फडणवीसांनी केला. 

क्लिक करा - अध्यक्ष महोदय, मी घोटाळा केला नाही

पूर्व विदर्भासाठी स्टिल प्लांटची घोषणा

विदर्भात 123 सिंचन प्रकल्पांचे काम सुरू आहेत. यापैकी कोणत्याही कामांना स्थगिती दिलेली नाही. विदर्भातील सिंचनाचे सर्व प्रकल्प जून 2023 पर्यंत पूर्ण करणार आहोत. तसेच पूर्व विदर्भात जमशेदपूर व भिलाईच्या धर्तीवर स्टिल प्लांट उभारणार असल्याची घोषणा मुख्यमंत्र्यांनी केली. 

पुढे व्याप्ती वाढणार

दहा रुपयांत गोरगरिबांना जेवण देण्याचा निर्णय राज्य सरकारने घेतला आहे. येत्या काळात गोरगरिबांना दहा रुपयांत शिवभोजन मिळणार आहे. याबाबतची घोषणा मुख्यमंत्री उद्धव ठाकरे यांनी केली. ही योजना राज्यातील 50 ठिकाणी प्रायोगिक तत्त्वावर सुरू करण्यात येणार असून, पुढे याची व्याप्ती वाढविण्यात येणार आहे.