वरठी/मोहाडी (जि. भंडारा) : भरधाव वाळूच्या ट्रॅक्‍टरच्या धडकेत एका व्यक्तीचा मृत्यू झाल्याची घटना मंगळवारी (ता. 2) सायंकाळी तालुक्‍यातील कोथुर्ना गावाशिवारात घडली. शरद उके (वय 35, रा. कोथुर्ना), असे मृताचे नाव आहे. या घटनेमुळे संतप्त जमावाने घटनास्थळी गर्दी केली होती.

कोथुर्ना येथील शरद उके (वय 35) काही कामानिमित्त वरठी येथे आला होता. सायंकाळी तो गावाला परत जात असताना गावापासून एक किमी दूर अंतरावर विरुद्ध दिशेने येणाऱ्या वाळू भरलेल्या ट्रॅक्‍टरने त्याला जोरदार धडक दिली. या अपघातात त्याचा जागीच मृत्यू झाला.

जिल्ह्यात वाळू वाहतुकीचा धुमाकूळ

जिल्ह्यात वाळू वाहतूक करणाऱ्या वाहनांनी धुमाकूळ घातला आहे. त्यामुळे रस्त्यावर धावणाऱ्या अवैध वाळू वाहतुकीकडे कुणाचेही लक्ष नाही. त्यामुळे अपघात होऊन अनेकांचे जीव जात आहेत. या घटनेची माहिती मिळताच गावातील शेकडो नागरिकांनी चक्काजाम आंदोलन करून मृताच्या कुटुंबीयाला आर्थिक मदत देण्याची मागणी केली. तसेच वाळू वाहतुकीला आळा घालण्याची मागणी केली आहे.

मृतदेह उचलण्यास गावकऱ्यांचा नकार

व्यक्तीच्या अपघाती मृत्यूमुळे गावात तणाव पसरला आहे. गावकऱ्यांनी मृतदेह उचलण्यासही नकार दिला होता. मात्र पोलिसांना पाचारण केल्यावर गावकरी शांत झाले. पोलिस निरीक्षक राजेश कुमार थोरात घटनास्थळी ताफ्यासह उपस्थित होते. भंडारा येथून अतिरिक्त कुमक बोलावण्यात आली आहे. अजूनपर्यंत मृतदेह उचलण्यात आले नव्हते.

हेही वाचा : गोंदिया जिल्ह्यात काय आहेत लॉकडाउनचे नवीन नियम? घ्या जाणून

वाळू वाहतुकीचा ट्रॅक्‍टर गावातील व्यक्तीचाच

वाळू वाहतूक करणारा ट्रॅक्‍टर गावातील व्यक्तीचाच असल्याने गावात तणाव निर्माण झाला आहे. मृताच्या मागे आईवडील, पत्नी व दोन अपत्य असल्याची माहिती मिळाली आहे. खबरदारी म्हणून गावात पोलिसांना तैनात करण्यात आले आहे. मृताच्या कुटुंबीयांना समजण्यासाठी पोलिस प्रयत्न करीत आहेत.