मंगरूळपीर - स्थानिक गवळीपुरा येथील एका पाच वर्षांच्या बालकाच्या अपहरणाचा प्रयत्न झाला. मात्र, चिमुकल्याच्या प्रसंगावधानाने तो अपहरणकर्त्यांच्या तावडीतून सुटला. ही घटना गुरुवारी (ता. 23) रात्रीच्या सुमारास घडली. या प्रकरणी मंगरूळपीर पोलिसांत दिलेल्या फिर्यादीवरून अज्ञात व्यक्तीसह एका महिलेविरुद्ध गुन्हा दाखल करण्यात आला.

या घटनेबाबत पोलिसांनी दिलेली माहिती अशी - येथील गवळीपुरा भागातील रहिवासी चॉंद रन्नू बेनीवाले यांचा मुलगा काल दुकानात चॉकलेट आणण्यासाठी गेला होता. मात्र, बराच वेळ उलटूनही तो परत आला नाही. त्यामुळे येथील मशिदीच्या ध्वनिक्षेपकावरून माहिती देण्यात आली.

त्यानंतर काही काळाने मुलगा भेदरलेल्या अवस्थेत घरी आला. एका पुरुषासह महिलेने आपल्याला पेट्रोलपंपाजवळ बांधून ठेवले होते. जवळ कुणीही नसताना आपण हात-पाय सोडून पळून आल्याचे त्याने सांगितले.