निलज : ब्रम्हपुरी तालुक्यातील चकबोथली येथे एका युवकाने गाढ झोपेत असलेल्या माय-लेकावर अॅसिडने हल्ला केल्याची घटना २९ नोव्हेंबरच्या पहाटे घडली. सदर घटनेत महिला व तिचा मुलगा गंभीर जखमी झाले आहेत. या घटनेमुळे तालुक्यात प्रचंड खळबळ माजली असून पुन्हा एकदा महिलांच्या सुरक्षिततेचा प्रश्न उभा ठाकला आहे. आरोपीचे नाव अमोल चौधरी (२३) असून त्याला पोलिसांनी अटक केली आहे.

सविस्तर माहीतीनुसार पीडीत महिला ही आपल्या मुलासोबत झोपली होती. तेव्हा पहाटेच्या सुमारास आरोपीने महिलेच्या घरात प्रवेश करुन साखर झोपेत असलेल्या माय-लेकावर अॅसिड फेकले. यात मायलेक गंभीर जखमी झालेत. यानंतर जखमींना त्वरीत ग्रामीण रूग्णाल़य ब्रम्हपुरी येथे उपचारासाठी दाखल करण्यात आले. मात्र जखमींची अवस्था गंभीर असल्यामुळे त्यांना पुढील उपचारासाठी जिल्हा रुग्णाल़य गडचिरोली येथे हलविण्यात आले. 

सदर घटनेमागील कारण अस्पष्ट असून पोलिस घटनेमागील कारणाचा शोध घेत आहेत. तपास पूर्ण झाल्यावर घटनेचे खरे कारण समोर येईल. सदर  घटनेतील आरोपीवर ३०७, ३२६(अ), ४५० कलमातंर्गत गुन्हा दाखल करण्यात आला आहे. प्रकरणाचा तपास उपविभागीय पोलिस अधिकारी प्रशांत परदेशी यांच्या मार्गदर्शनात पोलिस निरीक्षक विलास चव्हाण, सहाय्यक पोलिस निरीक्षक कडके, ठाकरे, मडावी, नेरलवार, महीला पोलिस शिपाई सुष्मा बारापात्रे इ. पोलिस कर्मचारी अधिक तपास करीत आहेत.