चंद्रपूर : शासकीय वैद्यकीय महाविद्यालयात शिकत असलेल्या एमबीबीएसच्या एका विद्यार्थ्याने वसतिगृहाच्या इमारतीवरून उडी घेऊन आत्महत्या केली. ही घटना रविवारी (ता. 15) दुपारच्या सुमारास घडली. रोहित पटेल असे मृत विद्यार्थ्याचे नाव आहे. या घटनेने वैद्यकीय महाविद्यालयाच्या वर्तुळात खळबळ उडाली आहे.
रोहित हा झांसी येथील ललितपूरचा रहिवासी होता. वैद्यकीय महाविद्यालयाच्या 2015 च्या पहिल्या तुकडीचा तो विद्यार्थी होता. यावर्षी तो अंतिम वर्षात होता. डिसेंबर महिन्यात त्याची परीक्षा होणार होती. रविवारी सुटीचा दिवस होता. त्यामुळे वसतिगृहातील विद्यार्थी निवांत होते. दुपारच्या सुमारास त्याने आपल्या मित्रांसोबत वसतिगृहाला लागूनच असलेल्या खानावळीत जेवण केले. त्यानंतर तो वसतिगृहातील आपल्या खोलीवर परतला. त्याने आपल्या कुटुंबीयांशी फोनद्वारे संवादही साधला. त्यानंतर तो वसतिगृहातील इमारतीच्या छतावर गेला. तेथून त्याने खाली उडी घेतली. हा प्रकार वसतिगृहातील विद्यार्थ्यांच्या लक्षात आला. त्याला तातडीने एका खासगी रुग्णालयात भरती करण्यात आले. मात्र, त्याचा मृत्यू झाला होता. महाविद्यालय व्यवस्थापन आणि रामनगर पोलिसांना याची माहिती मिळताच त्यांनी लागलीच घटनास्थळ गाठले. त्याचा मृतदेह जिल्हा सामान्य रुग्णालयात शवविच्छेदनासाठी पाठविण्यात आला आहे. त्याच्या आत्महत्येचे कारण अजून स्पष्ट झाले नाही. पुढील तपास रामनगर पोलिस करीत आहेत.