अमरावती : एकीकडे शेतकरी, शेतमजूर, सामान्यांचे प्रश्न कायम असताना सत्तेच्या मदतीने दबावाचे राजकारण करणाऱ्यांना जनता निवडणुकीत धडा शिकविल्याशिवाय राहणार नाही, असे प्रतिपादन प्रहार जनशक्ती पक्षाचे संस्थापक, आमदार बच्चू कडू यांनी आज नेहरू मैदान येथील जाहीर सभेत केले.

‘प्रहार’चे उमेदवार दिनेश बूब यांच्या प्रचारार्थ शहरात जोरदार शक्तिप्रदर्शन करण्यात आले. त्यानंतर नेहरू मैदान येथे जाहीर सभेचे आयोजन करण्यात आले होते. बच्चू कडू म्हणाले, ‘‘आम्हाला सभेची असलेली परवानगी रद्द करून केंद्रीय गृहमंत्री अमित शहा यांच्या सभेला सायन्सकोर मैदानावर प्रशासनाकडून परवानगी देण्यात आली.

हा प्रकार दडपशाहीचा असून सर्वसामान्य जनता त्याचा बदला घेतल्याशिवाय राहणार नाही. निवडणूक जाहीर झाल्यानंतर कापूस व तुरीचे भाव खाली आले आहेत. त्यामध्ये शेतकरी भरडून निघत आहे. ’’

रक्तदानातून निषेध करणार

सायन्सकोर मैदानावर प्रहारला सभेची परवानगी असतानाही प्रशासनाने सभा घेऊ न दिल्याच्या विरोधात आपण स्वतः १०० कार्यकर्त्यांसह जिल्हा सामान्य रुग्णालयात रक्तदान करणार असल्याची घोषणा कडू यांनी केली.