नागपूर - वाहन कर्जाचे हफ्ते बुडवून फायनान्स कंपनीची तब्बल साडेबारा लाखांनी फसवणूक करण्यात आल्याचे प्रकरण उघडकीस आले आहे. या प्रकरणी सदर पोलिसांनी महिलेसह दोघांविरुद्ध गुन्हा दाखल केला आहे. मिथिलेश दुबे (61, रा. तेलंगखेडी मंदिराजवळ) आणि मोहम्मद मतील कुरेशी (40, रा. नांदेड) अशी आरोपींची नावे सांगण्यात येतात.

पोलिसांच्या माहितीनुसार मिथिलेश दुबे हिने सिव्हिल लाइन्स येथील टाटा मोटर्स फायनान्स सोल्युशन प्रा. लि. कंपनीतून फेब्रुवारी 2012 मध्ये 12.58 लाखांचे वाहनकर्ज घेतले. ठरल्याप्रमाणे महिलेने वाहन खरेदीही केले. पण, त्यानंतर बनावट कागदपत्रे तयार करून सदर वाहन मोहम्मद कुरेशीच्या नावे करून दिले. कर्जाची परतफेड होण्यासाठी कंपनीने न्यायालयात धाव घेतली. प्रथम श्रेणी न्यायदंडाधीकाऱ्यांच्या आदेशावरून तसेच कंपनीचे अधिकारी अनिल शाहू यांच्या तक्रारीवरून सदर पोलिसांनी फसवणुकीचा गुन्हा दाखल करीत प्रकरणाचा तपास सुरू केला आहे.