नागपूर - पूर्व विदर्भातील महत्त्वाकांक्षी गोसे खुर्द सिंचन प्रकल्पातील कामांच्या निविदा प्रक्रियेदरम्यान झालेल्या गैरव्यवहारासंदर्भात लाचलुचपत प्रतिबंधक विभागाने आज सदर पोलिस ठाण्यात आणखी सहा गुन्हे दाखल केले. जलसंपदा विभागातील तत्कालीन अधिकारी आणि कंत्राटदारांसह एकूण 29 जणांविरुद्ध हे गुन्हे दाखल केले आहेत. "एसीबी'च्या या धडक कारवाईमुळे गैरव्यहारात सहभागी असलेल्यांचे धाबे दणाणले आहे. आता दाखल गुन्ह्यांची संख्या 14 झाली. 

पोलिस महासंचालक (एसीबी) यांनी गोसी खुर्द सिंचन प्रकल्पातील कामांचे निविदा प्रक्रियेदरम्यान झालेल्या भ्रष्टाचारासंबंधी चौकशी करण्याचे आदेश पोलिस अधीक्षकांना दिले. राज्याच्या गृहविभागाने कारवाईचे आदेश जारी केले होते. जलसंपदा विभागातील तत्कालीन अभियंते, विभागीय लेखाधिकारी व संबंधित कामाचे कंत्राटदार, त्यांचे भागीदार यांचा सहभाग असल्याचे दिसून आले आहे.