नागपूर : मागील तीन-चार दिवस दमदार पाऊस कोसळल्याने नागपूर जिल्हा व विदर्भातील धरणांच्या जलसाठ्यात बऱ्यापैकी वाढ झालेली आहे. नागपूर शहराला पाणीपुरवठा होणाऱ्या तोतलाडोह, खिंडसी व कामठी खैरी जलाशयातही पुरेसा जलसाठा जमा झाल्याने गतवर्षीप्रमाणेच यंदाही नागपूरकरांना आगामी उन्हाळ्यात भरपूर पाणी मिळण्याची शक्यता वर्तविली जात आहे.

जुलै महिन्यात अपेक्षेप्रमाणे कमी पाऊस पडल्याने व मधल्या काळात मोठा खंड पडल्याने नागपूर जिल्हा व विदर्भातील बहुतांश प्रकल्पांची स्थिती चिंताजनक होती. मात्र, ऑगस्ट महिन्यात आठ-नऊ दिवस चांगला पाऊस झाल्याने धरणांतील साठ्यात वाढ झाली आहे. विदर्भातील विविध मोठ्या, मध्यम व छोट्या धरणांमधील उपलब्ध जलसाठ्यांचा विचार केल्यास परिस्थिती आटोक्यात आहे.

सद्यस्थितीत नागपूर विभागातील १६ मोठ्या धरणांमध्ये गतवर्षीच्या तुलनेत (७६ दशलक्ष घनमीटर) ५६ दशलक्ष घनमीटर इतका पाणीसाठा शिल्लक आहे. तर ४२ मध्यम प्रकल्पांमध्ये गतवर्षीपेक्षा (५८.३३ दशलक्ष घनमीटर) ३०.७४ दशलक्ष घनमीटर इतका साठा उपलब्ध आहे. ३२६ छोट्या प्रकल्पांची स्थिती थोडी चिंताजनक आहे. आजच्या तारखेला छोट्या प्रकल्पांमध्ये केवळ १६.२४ दशलक्ष घनमीटर जलसाठा आहे, जो गतवर्षी ५६.७९ दशलक्ष घनमीटरपेक्षा कमी आहे. नागपूर शहराला पाणीपुरवठा करणाऱ्या धरणांच्या स्थितीत थोडीफार सुधारणा झाली आहे.

आजच्या घडीला पेंच नदीवरील तोतलाडोह जलाशयात ६४.१३ दशलक्ष घनमीटर जलसाठा शिल्लक असून, कामठी खैरी व खिंडसी जलाशयात अनुक्रमे ५६.६४ व ४०.४८ दशलक्ष घनमीटर जलसाठा उपलब्ध आहे. पावसाळा संपायला आणखी सव्वा महिना शिल्लक असल्याने व या आठवड्यात प्रादेशिक हवामान विभागाने जोरदार पावसाची शक्यता वर्तविल्याने धरणे काठोकाठ भरण्याची दाट शक्यता आहे. त्यामुळे गतवर्षीप्रमाणे यंदाच्याही उन्हाळ्यात पिण्याच्या पाण्याचे संकट टळणार, अशी चिन्हे दिसत आहे.

धरणातील जलसाठ्याची स्थिती (दशलक्ष घनमीटरमध्ये)

धरण आजचा साठा गतवर्षीची स्थिती

तोतलाडोह ६४.१३ ९५.०७

खिंडसी ४०.४८ ३७.९६

कामठी खैरी ५६.६४ ९४.७२

गोसेखुर्द ५५.७७ ५३.७५

इटियाडोह ३७.४५ ७२.१६

पुजारीटोला ५१.४३ ५२.७८

आसोलमेंढा ८६.८१ १००

बावनथडी ४३.७६ ६८.०९

बेंबळा ८६.७६ ९१.७३

खडकपूर्णा ३६.२८ ८१.००

काटेपूर्णा ९३.२३ ९१.४८

अप्परवर्धा ६९.४२ ९४.६९

लोअर वर्धा ७६.३४ ८६.८१

बोर ७४.४१ ८२.८१

दिना ३८.८१ ४६.४८