भिवापूर : एसटी बसने ये-जा करतांना बसचे चालक-वाहक धक्काबुक्की करतात, शिव्या देतात कधी-कधी मारतात.एसटी कर्मचाऱ्यांच्या या अभद्र वागणुकीमुळे विद्यार्थीनींना शारीरिक व मानसिक त्रास सहन करावा लागतो. या जाचातून मुक्ती मिळावी. यासाठी पिडीत विद्यार्थिनींनी शुक्रवारी तहसील कार्यालयात तहसीलदार कल्याणकुमार डहाट यांची भेट घेत, आपली व्यथा त्यांच्यापुढे मांडली.

या पिडीतांमध्ये मांगली, नक्षी, पांढरवानी या गावच्या विद्यार्थिनींचा समावेश आहे. या सर्व विद्यार्थिनी येथील भिवापूर एज्युकेशन सोसायटी द्वारा संचालित हायस्कुल व कनिष्ठ महाविद्यालयात शिकत असून दररोज एसटी बसने ये-जा करतात. बस मध्ये चढता उतरतांना व प्रवासादरम्यान त्यांना बसचे चालक व वाहक यांच्याकडून होत असलेला त्रास त्यांनी तहसीलदार डहाट यांच्या निदर्शनास आणून दिला. त्यावर तातडीने कार्यवाही करण्याचे आश्वासन डहाट यांनी यावेळी विद्यार्थिनींना दिले.

विद्यार्थीनींसोबत होतो दुव्यवहार

शिक्षणासाठी मोखाळा, भागेबोरी, मांगली, नक्षी, वढध, मेढा, झिलबोडी, हत्तेबोडी, पांढरवानी, जवळी, तातोली, बोर्डकला आदी गावातील शाळा, कॉलेजचे मूलं, मुली दररोज भिवापूरला ये-जा करतात. या मार्गावर मोजक्याच बसेस असल्याने बसमध्ये गर्दी होऊन दाटीवाटीने विद्यार्थी भरले जातात. नेमके याच संधीचा फायदा उचलत चालक व वाहकाकडून विद्यार्थिनींसोबत दु्रव्यवहार केला जातो.

प्रवासादरम्यान कोंबले जातात विद्यार्थी

एकाच वेळी सर्वच शाळांना सुटी होत असल्याने विद्यार्थ्यांचा परतीचा प्रवास फारच वेदनादायी असतो. मुलं मुली अक्षरशः बसमध्ये कोंबले जातात. अशा स्थितीत विशेषतः विद्यार्थिनींना प्रचंड त्रास सहन करावा लागत असल्याचे विदारक चित्र आहे. चालक वाहकासोबतच अनेकदा बसमधील अन्य प्रवाशांच्याही "बॅड टच" च्या वेदना विद्यार्थिनींना मुकाट्याने सोसाव्या लागतात.

एसटी महामंडळाचे वरिष्ठ अधिकारी चवरे यांच्याशी बोलून विद्यार्थ्यांना ये जा करतांना होत असलेल्या त्रासाविषयी त्यांना अवगत केले. त्यावर तातडीने कार्यवाही करण्याचे आश्वासन चवरे यांनी दिले.

- कल्याणकुमार डहाट, तहसीलदार भिवापूर