Nagpur Crime News: भूखंडाचा वाद इतका विकोपाला गेला की, पतीने चक्का पत्नीच्या डोक्यावर दगड हाणून खून केला. ही घटना बेलतरोडी पोलिस ठाण्याच्या हद्दीत शिवणगाव पुनर्वसन येथे मंगळवारी भरदुपारी घडली.

शैजा नागपुरे (५३) रा. साकेतनगरी असे मृत महिलेचे नाव आहे. तर बाबाराव नागपुरे (५६) असे आरोपीचे नाव आहे. पोलिसांनी खुनाचा गुन्हा नोंदवून आरोपीला अटक केली आहे.

प्राप्त माहितीनुसार, शैजा ही बाबारावची दुसरी पत्नी होती. पहिली पत्नी उमरी (समुद्रपूर) येथे तर दुसरी साकेतनगरी येथे राहात होती. बाबाराव दुसऱ्या पत्नीसोबत म्हणजे शैजा हिच्या सोबत राहायचा.

शिवणगाव पुनर्वसन येथे त्यांचा एक भूखंड आहे. शैजा सोबत संपत्तीवरून नेहमीच वाद व्हायचा. सततच्या भांडणाला कंटाळून बाबारावने घर सोडले आणि तो बाहेरच राहायचा. इकडे तिकडे भटकण्यापेक्षा बाबारावने शिवणगाव येथील भूखंडावर झोपडी बांधून राहण्याचा निर्णय घेतला.

मंगळवारी तो प्लॉटवर गेला. साफसफाई करीत असतानाच शैजा प्लॉटवर आली. यावेळी पती पत्नीत पुन्हा भूखंडावरून वाद झाला. वाद विकोपाला जाताच संतापलेल्या बाबारावने दगड उचलून शैजाच्या डोक्यात हाणला. ती रक्तबंबाळ होऊन कोसळली.

निपचित पडल्याचे पाहून बाबाराव घटनास्थळावरून पळून गेला. एक महिला रक्तबंबाळ अवस्थेत पडून असल्याची माहिती बेलतरोडी पोलिसांना मिळाली. पोलिसांनी घटनास्थळ गाठले. पंचनामा करून मृतदेह शवविच्छेदनासाठी रवाना केला तसेच आरोपी विरुद्ध गुन्हा नोंदवून आरोपीला अटक केली.