कळमेश्वर (जि.नागपूर)  :  खापरखुटी, अळू, काटवेल, सूरण, टरोटा, टेना, बांबूचे वायदे, कुंदरभाजी, कुड्याची फुल आणि या सारख्या अनेक रानभाज्यांची नावे ऐकली आहेत हो कधी? या रानभाज्या आरोग्यासाठी फारच पौष्ठीक आहेत असे जाणते सांगतात बरं! आणि या रानभाज्या नक्की कुठे आढळतात? विशेषतः शेतीच्या धुऱ्यावर, डोंगरदऱ्यांमध्ये त्या हमखास आढळतात मित्रांनो ! अलीकडे बाजारात त्यांची मागणी खूप वाढली आहे. त्या आरोग्यासाठी अतिउत्तम आणि पोषक असतात म्हणे ! जंगलात राहणारे आदिवासी बांधव व काही जुनेजाणती मंडळी आजही या भाज्या आवर्जून खातात. पण अनेकांना या वनसंपदेची माहितीच नाही. या उज्वल वनठेव्याची माहिती व्हावी यासाठी आता कृषी विभाग सरसावला आहे.

अधिक वाचा  : ...आणि बँकेच्या अधिकाऱ्यांनी फेकली शेतकऱ्यांची कर्जासाठीची कागदपत्रे!

महोत्सवात होईल रानभाज्यांची ओळख
कळमेश्वर तालुका कृषी अधिकारी कार्यालयाच्या वतीने उद्या रविवारी (ता.९) कळमेश्वर तहसील कार्यालय परिसरात भव्य रानभाजी महोत्सवाचे आयोजन करण्यात आले आहे. जिल्ह्यातील संपूर्ण तालुका कृषी कार्यालयाअंतर्गत या रानभाज्यांचे प्रदर्शन भरविण्यात येणार आहे. कळमेश्वर तालुका वनवैभवाने संपन्न आहे. येथील जंगलात मोठ्या प्रमाणावर दुर्मीळ वनस्पती आढळतात. त्याचप्रमाणे मानवी जीवनास उपयोगी रानभाज्यांचा खजिना येथे आहे. मानवी आरोग्यास अतिशय लाभदायी ठरणाऱ्या विविध रानभाज्या जंगलालगत असणारे नागरिक चवीने खातात. तसेच शेतातील माळरानात, बांधांवर, पडिक जमीनीवर आाढळणाऱ्या रानभाज्या जुने शेतकरी आावडीने खातात. पूर्वी आदिवासी बांधव व जुन्या जाणत्या नागरिकांना या भाज्यांची खडानखडा माहिती होती. पण आता मात्र या रानभाज्या, रानफुले, उपलब्ध असून देखील अनेकांना माहीत नाही. त्यामुळे हा महत्त्वपूर्ण रानठेवा पूर्णतः दुर्लक्षित आहे.

अधिक वाचा : मुलीचे लग्न मुलाच्या घरी ‘मेसेज’ पाठवून तोडले, म्हणून जन्मदात्रीने उचलले टोकाचे पाऊल....

नवीन पिढीला माहिती मिळणे सुलभ व्हावे
जंगली काटवेल, कुड्याची फुले, कुंदरभाजी, टेना, तरोटा ,खापरखुटी व अशा अनेक रानभाज्या रानफुलांची चव उत्तम असते. याचसोबत त्या आरोग्यासाठी अतिउत्तम आहेत.कृषी विभागाच्या वतीने उद्या ९ ऑगष्ट रोजी जिल्ह्यातील संपूर्ण तालुका कृषी विभागाच्या कार्यालयात रानभाज्यांचे व रानफुलांचे प्रदर्शन भरविण्यात येणार आहे. यासाठी विभागाची कळमेश्वर तालुक्याची यंत्रणा कामाला लागली आहे. अनुभवी, जाणते व ज्येष्ठ नागरिकांकडून रानभाज्यांची, रानफुलांची माहिती गोळा करण्याचे काम सुरू झाले आहे. स्वतः तालुका कृषी अधिकारी कार्यालय या उपक्रमाकरिता प्रकर्षाने परिश्रम घेत आहेत. या उपयोगी रानठेव्याची माहिती प्रदर्शित झाल्यास नवीन पिढीला याची माहिती मिळणे सुलभ होणार असून त्यांच्यासाठी ते फायदेशीर ठरणार आहे. म्हणून शासनाच्या वतीने या रानभाजी महोत्सवाचे आायोजन करण्यात आाले असून सर्व शेतकऱ्यांसह तालुकावासींनी उपस्थित राहावे असे आावाहन तालुका कृषी अधिकारी जे.पी.नेरलवार यांनी केले आाहे.

संपादन  : विजयकुमार राऊत