शेतकऱ्यांच्या कष्टाला ज्याची कायम साथ असते असा शेतकऱ्याचा मित्र बैल. दरवर्षी महाराष्ट्रात मोठ्या धूमधडाक्यात बैलपोळा साजरा केला जातो. त्यानंतर येतो लहान मुलांचा तान्हा पोळा. यंदा नागपूरमध्येही कोरोनाच्या दोन वर्षानंतर हा उत्सव जोरदार साजरा करण्यात आला. तान्हा पोळ्यासाठी तयार करण्यात आलेल्या सगळ्यात मोठ्या लाकडी बैलानं अनेकांचं लक्ष यावेळी वेधून घेतलं आहे. सोशल मीडियावरही या लाकडी बैलाची जोपदार चर्चा रंगली आहे. (Vidarbha Famous Festival Tanha Pola)

विदर्भ वगळता कुठेही तान्हा पोळा साजरा केला जात नाही. १८०६ मध्ये दुसरे श्रीमंत राजे रघुजी महाराज भोसले यांनी हा उत्सव सुरू केला होता. लहान मुलांना बैलाचे महत्व कळावे म्हणून त्यांनी लाकडी बैल पोळ्याची सुरूवात केली. रघुजी यांनी लाकडी बैल बनवायला टाकले आणि सगळ्या लहान मुलांत ते वाटले होते. आंब्याचे तोरण लावून, फळं, चॉकलेट, बिस्किट पुडे अशा विविध वस्तूंनी हे तोरण सजवले जायचे.

यात लहान मुलांना लाकडी बैलांसह उभे करून त्यांची पूजा केली जायची. पूजा संपल्यानंतर तोरण तोडून मुलांना खाऊ वाटण्यात यायचा. नागपूरमध्ये असलेल्या मुधोजी राजे यांच्या महाल येथील निवासस्थानी तुम्हाला मोठा लाकडी बैल बघायला मिळेल. या लाकडी बैलाची उंची आठ फूट आणि लांबी सहा फूट असून बैलाच्या पायात चांदीचा तोडा आहे.