नागपूर ः मध्यरात्रीनंतर मुलगी घरात नसल्याचे लक्षात येताच आईवडिलांना शोधाशोध सुरू केली. शेजारी राहणाऱ्या युवकाच्या घरी विचारपूस करण्यास गेले असता मुलगी तेथे चक्क झोपलेली दिसली. आईवडीलांनी मुलीसह पोलिस स्टेशन गाठले. तक्रारीवरून पोलिसांनी युवकाविरुद्ध बलात्काराचा गुन्हा दाखल केला. 

हेही वाचा - महिलादिनीच संतापजनक प्रकार!  नामांकित हॉस्पिटलच्या डॉक्टरनं केला नर्सवर बलात्कार  

बादल प्रमोद गोस्वामी (२१, अमरनगर) असे आरोपीचे नाव आहे. पोलिसांनी दिलेल्या माहितीनुसार, पीडित मुलगी ही वानाडोंगरीतील एका सायन्स कॉलेजला अकराव्या वर्गात शिकते. फेसबुकवर तिची बादलसोबत ओळख झाली. बादलने तिला फ्रेंड रिक्वेस्ट पाठविली. बादल हा वस्तीतच राहत असल्याने तिने त्याची रिक्वेस्ट स्वीकारली. त्यानंतर दोघांचे व्हॉट्सअ‍ॅपवरही चॅटिंग सुरू झाले. 

रिकामटेकडा असलेल्या बादलने तिला प्रेमाच्या जाळ्यात ओढले. डिसेंबर २०१९ मध्ये ती केवळ १५ वर्षांचीच असताना तिला घरी कुणी नसताना बादलने आपल्या घरी बोलावले. तिच्यावर बलात्कार केला. त्यानंतर तो तिला धमकी देऊन वाटेल तेव्हा बोलवित होता. रविवारी मध्यरात्रीनंतर दोघांची भेट ठरली. मुलीने घरातील सर्वांना झोपल्यानंतर बादलचे घर गाठले. एकाच खोलीत दोघेही पहाटेपर्यंत होते. 

हेही वाचा - प्रेम एकीवर अन् साखरपुडा दुसरीशी; विवाहित प्रेयसीवर बलात्कार तर होणाऱ्या पत्नीला दिला दगा

दरम्यान, मुलगी बेडवर नसल्याने तिच्या आईवडिलांची झोप उडाली. त्यांनी तिचा शोध घेतला. त्यांनी बादलला विचारण्यासाठी दार ठोठावले. त्यावेळी ती बादलच्या घरात त्याच्या बेडवर झोपलेली दिसली. आईवडिलांनी तिला विश्वासात घेऊन विचारणा केली असता हा प्रकार उघडकीस आला. याप्रकरणी एमआयडीसी पोलिसांनी बलात्काराचा गुन्हा नोंदवून बादलला अटक केली.

संपादन - अथर्व महांकाळ