कन्हाना : आर्थिक व्यवहारातून झालेल्या वादात मध्यस्थी करण्याचा प्रयत्न करणाऱ्या आईवर पिस्तुलातून गोळी सुटल्याने ती गंभीर जखमी झाली. याप्रकरणी मुलगा सुनील तिवारी यास अटक करण्यात आली असून त्याच्याकडून दोन पिस्तूल आणि धारदारशस्त्र जप्त करण्यात आले आहे. ही घटना आज, सकाळी साडेनऊच्या सुमारास घडली.

कांद्री येथील सुनील तिवारी यांच्या घरी नितीन केशरवानी हे दोघांना घेऊन पैसे मागण्यास गेला. दरम्यान दोघांमध्ये बाचाबाची झाली. त्यांचा वाद सोडविण्यासाठी सुनील तिवारी याची आई शोभा हिने मध्यस्थी केली. त्यांच्या वादामध्ये मुलगा सुनील याच्या हातातील पिस्तुलातून गोळी सुटली आणि आई शोभा हिच्या हाताला लागून गेली.

यात ती गंभीर जखमी झाली. उपचारासाठी तिला रुग्णालयात दाखल करण्यात आले आहे. पोलिसांनी सुनील तिवारी यास अटक केली. तसेच त्याच्याकडून दोन पिस्तूल आणि चाकू जप्त केला.