Nagpur Gangwar Firing on Beef Smuggler: नागपुर शहरात लपूनछपून गोवंशाची तस्करी करणाऱ्या दोन टोळीमध्ये जुन्या वादातून टोळीयुद्ध भडकले आहे. त्यातून शुक्रवारी पहाटे साडेपाच वाजताच्या सुमारास कपिलनगर पोलिस ठाण्याच्या हद्दीतील कामगारनगरात सोनू बंदर ऊर्फ शेख इमरान याच्या टोळीवर शेख शादाब वल्द शेख गुलाब याच्या टोळीने हल्ला करीत गोळीबार केला. यामध्ये सोनू बंदरचा मित्र जखमी झाला.

अमजद शेख वल्द शब्बीर शेख (वय ३० रा. यशोधरानगर) असे जखमीचे नाव आहे. शेख शादाब वल्द शेख गुलाब, वय २७, रा. अन्सारनगर), सोहेल बावला अशी आरोपींची नावे आहेत. पोलिसांनी दिलेल्या माहितीनुसार सोनू बंदर ऊर्फ शेख इमरान अब्दुल सत्तार शेख (वय २३, रा. कामगार नगर, नारी रोड, कपीलनगर) हा अमजद शेख वल्द शब्बीर शेख, वसिम नसिम खान, आरान वल्द मख्तार शेख यांच्यासह मोमीनपुऱ्यातून नमाज अदा केल्यावर कामगारनगर येथे आपल्या मोठ्या भावाकडे येत होता.

दरम्यान तो पेट्रोल भरण्यासाठी कामठी मार्गावरील मोहम्मद अली पेट्रोल पंपावर गेला. पेट्रोल भरून झाल्यावर ते निघत असताना कामगारनगराकडे निघाले. तेव्हाच मागून शादाबसह सहा ते सात जण इनोव्हा कारमधून त्याच्या जवळ आले. त्यांच्याजवळ पिस्तुलासह तलवारी आणि इतर घातक शस्त्र होते. दरम्यान खाली उतरून शादाबने सोनूवर हल्ला केला. (Latest Marathi News)

असा आहे वाद

पोलिसांनी दिलेल्या माहितीनुसार, शादाब आणि सोनू बंदर हे काही महिन्यांपूर्वी एकाच टोळीत गोवंश तस्करीचे काम करायचे. मात्र, त्यांची भांडणे झाल्याने ते वेगळे झाले. १० मार्चला मौदा आणि कळमेश्‍वर ठाण्याच्या हद्दीत गोवंश तस्करी करताना वाहन पकडण्यात आले. ते वाहन आणि माल शादाब याचा असल्याचे आढळले. याप्रकरणी शादाबसह त्याच्या साथीदारांवर गुन्हे दाखल झाले.

त्यात सोनू विरा नावाच्या आरोपीला पोलिसांनी अटक केली. याबाबत सोनू बंदर याने टीप दिल्याची माहिती शादाबला कळली. मात्र, त्यात सोनू बंदरचा मित्र सोनू विरा हा शादाबसाठी काम करीत असल्याचे कळल्याने त्याला भेटण्यासाठी सोनू बंदर आणि त्याचे साथीदार गेले होते. ही बाब शादाबला माहिती पडली. त्यामुळे सोनूचा गेम करण्याच्या विचाराने त्याने पहाटे साथीदारांसह त्याचावर हल्ला केला. त्यात सोनू बंदर थोडक्यात बचावला. (Latest Marathi News)