मंगरुळपीर : येथील तहसील कार्यालयाच्या आवारतच असलेल्या मुद्रांक कार्यालयात मुद्रांक खरेदीसाठी मुद्रांक विक्रेत्यांकडे स्टॅम्प घेण्यासाठी कार्यालयात तहसील आवारातील मुद्रांक विक्रेत्यांकडे गर्दी नेहमीच असते. परंतु, ना विक्रेत्यांना मास्क ना, नागरिकांना मास्क नसल्याने कोरोनाचे नियमांचा फज्जा उडत आहे. तरी, या ठिकाणी कोरोनाचे नियम धाब्यावर बसवून बेजबाबदार गर्दीमुळे कोरोनासारख्या आजाराला परत आमंत्रण दिले जात आहे का? असा प्रश्न निर्माण होत आहे.

नागरिकांना आपल्या विविध कामासाठी मुद्रांकाची आवश्यकता असते. खरेदी- विक्री यासह बँकेचे कर्ज आणि इतरही कामासाठी मुद्रांकची मागणी केली जात आहे. मात्र, सकाळी दहा वाजतापासून ग्रामीण भागातून शेतकरी व इतरही नागरिक मुद्रांक मिळावा म्हणून तहसील कार्यालयाच्या आवारातील मुद्रांक विक्रेत्यांकडे येतात. त्यामुळे मुंद्राक विक्रेत्यांसमोर मोठी गर्दी होत आहे. स्टॅम्प घेण्यासाठी मोठी गर्दी होत असल्याने मुद्रांक विक्रेते देखील वैतागले आहेत.

सध्या बॅँक कर्ज, वीज कनेक्शन, घरकुल, संजय गांधी निराधार योजनेची प्रकरणे, प्लॉट खरेदी-विक्री, शेती, घर, वाहन यासाठी स्टॅम्पची मोठी मागणी आहे. त्याकरिता मुद्रांक विक्रेत्यांकडे नागरिक गर्दी करीत असतात. परंतु, तेथे कोणत्याही प्रकारच्या कोरोना नियमांचे पालन होत नसून ५०० वर्ग मीटरच्या खोलीमध्ये शंभरावर नागरिकांची गर्दी होत असते. त्यामध्ये ना नागरिकांना मास्क असते ना विक्रेत्यांना. या सर्व गोंधळाला पाहून कोरोना पूर्णतः गेला काय? असाही प्रश्न उपस्थित होत आहे.

एका शाळेत हलविले होते विक्रेते

या आधी ‘सकाळ’ मध्ये वृत्त प्रकाशित करण्यात आले होते. त्यावेळी तत्कालीन उपविभागीय अधिकारी यांनी ‘सकाळ’ च्या वृताची गंभीर दखल घेऊन मुद्रांक विक्रेत्यांना शहरातील एका शाळेत हलविले होते. आता संबंधित अधिकारी याबाबींची दखल घेणार काय? असा प्रश्न निर्माण झाला आहे.

विना मास्क जनता सुसाट

कोरोनाचा संसर्ग अजूनही पूर्णपणे थांबला नाही. कोरोनाचे नियमही शासनाने शिथिल केले नाहीत, सुरक्षित अंतर व तोंडावर मास्क लावणे आवश्यक असताना मास्क कोणाच्याही तोंडावर दिसत नाही. संभाव्य तिसऱ्या लाटेच्या इशाऱ्याच्या पार्श्वभूमीवर विनामास्क धोकादायक ठरण्याची भीती व्यक्त होत आहे. प्रशासनाने याची गंभीर दखल घेणे आवश्यक आहे.