बाळापूर: तालुक्यात नात्याला काळिमा फासणारी एक धक्कादायक घटना घडली आहे. चुलत्याने स्वतःच्या पुतणीचा विनयभंग केल्याचा गुन्हा बाळापूर पोलिसात दाखल झाला आहे.

मिळालेल्या माहितीनुसार बाळापूर तालुक्यातील एका गावात राहणाऱ्या एका १९ वर्षीय युवतीचा तिच्या ३५ वर्षीय चुलत्यानेच विनयभंग करून स्वत: जीव देऊन चिठ्ठीत तिचे नाव लिहून ठेवण्याची धमकी दिल्याची घटना घडली आहे.

याप्रकरणी बाळापूर पोलिस ठाण्यात बुधवारी (ता.२८) रात्री उशिरा गुन्हा दाखल करण्यात आला आहे. संबंधित पीडित युवती बुधवारी (ता.२८) घरी एकटीच होती. त्यामुळे ती घरी एकटीच असल्याची संधी साधत तिच्या चुलत्याने घरात प्रवेश केला.

त्यानंतर स्वतःच्या पुतणीशी अश्लील संभाषण करत वाईट उद्देशाने युवतीचा विनयभंग केला. त्यानंतर या घटनेची वाच्यता कुठे केल्यास स्वतः जीव देऊन चिठ्ठीत तुझे नाव लिहूत ठेवणार, अशी धमकी सुद्धा आरोपी चुलत्याने दिली.

याप्रकरणी पीडितेने संध्याकाळी आई-वडिलांना ही बाब सांगितल्यानंतर तिच्या कुटुंबियांनी बाळापूर पोलिस ठाणे गाठत फिर्याद नोंदविली. पोलिसांनी आरोपीविरुद्ध गुन्हा दाखल केला आहे.