Nagpur Crime - आर्थिक व्यवहार व प्रॉपर्टीच्या कारणावरून छळ करीत आत्महत्येस प्रवृत्त करणाऱ्या कामठीच्या जयस्तंभ चौक येथील रहिवासी बापलेकासह तिघांविरोधात मंगळवारी (ता.६)नवीन कामठी पोलिस स्टेशनला गुन्हा दाखल केला. संजय रामस्वरुप शर्मा, राम संजय शर्मा दोघेही रा. जयस्तंभ चौक, शुभोजीत कुंडू रा. यशोधरानगर येरखेडा यांचा आरोपींमध्ये समावेश आहे.

पोलिसांनी दिलेल्या माहितीनुसार कुंभारे कॉलोनी रहिवासी व कामठीच्या सैन्य विभागातील एपीएस विभागात स्वयंपाकी म्हणून नोकरीवर असलेल्या विश्वजित कुमार धमगाये नामक २५ वर्षोय तरुणाने मध्यप्रदेशातील शिवणी येथील के.के. लॉजच्या खोलीत गळफास घेऊन आत्महत्या केल्याची घटना २८ ऑक्टोबर २०२२ रोजी उघडकीस आली होती.

त्यावेळी आत्महत्येचे कारण कळू शकले नव्हते. ही आत्महत्या नसून घातपात झाल्याचा आरोप मृतकाचे वडील कुमार कवडू धनगाये (५४) यांनी केल्याने पोलिसांनी तपासाला गती दिली. आर्थिक व्यवहार व प्रॉपर्टीच्या कारणावरून छळ करीत असल्याचे घटनास्थळी मिळालेल्या सुसाईड नोटमध्ये लिहिले होते. या आधारे पोलिसांनी सदर प्रकरणात तपास करीत अखेर मंगळवारी भादंवी कलम ३०६, ३४ अन्वये गुन्हा दाखल करण्यात आला.