Nagpur News : एमआयडीसीमधील रायसोनी अभियांत्रिकी महाविद्यालयासमोर मोपेडवरून ट्रिपल सिट जाणाऱ्या विद्यार्थिनींना कारने धडक देत, गंभीर जखमी केले. ही घटना शनिवारी (ता.२९) मध्यरात्री दीडच्या सुमारास उघडकीस आली. याप्रकरणी आरोपी कारचालकाला पोलिसांनी अटक केली.

सय्यद साजिद सय्यद साहिल (वय २९, रा. हसनबाग) असे आरोपी कारचालकाचे नाव असून राजेश्‍वरी नरेशचंद्र पाटील (वय २०), हिरल तुषार आठवले (वय १९, रा. लक्ष्मीनगर) आणि ओम पाटील (वय १६) अशी जखमींची नावे आहेत. पोलिसांनी दिलेल्या माहितीनुसार, हिरल, रामेश्‍वरी या दोघीही बी.टेक.द्वितीय वर्षाला असून रामेश्‍वरीचा भाऊ ओम अकरावीत शिकतो.

तिघेही राजेश्‍वरीच्या मोपेडवरून (एमएच ३१, ईव्ही ९९५६) लता मंगेशकर हॉस्पिटलच्या कॅन्टीनमध्ये जात असताना, त्यांना समोरून भरधाव कारने (एमएच ४३,एजे ६१९७) धडक दिली. त्यात हिरलच्या पायाला दुखापत झाली. तिला आणि ओमला लता मंगेशकर रुग्णालयात दाखल करण्यात आले. दरम्यान गंभीर जखमी राजेश्‍वरीला एम्समध्ये दाखल करण्यात आले. पोलिसांनी सय्यद साजिदला अटक केली.