Muslim Voters in Loksabha: नागपूर लोकसभा मतदारसंघात सुमारे दीड लाखांच्या घरात असलेल्या मुस्लिम मतांवर सर्वांचा डोळा आहे. अधिकाधिक मुस्लिमांनी मतदानात सहभागी व्हावे, याकरिता सध्या काँग्रेसमधून कसोशीने प्रयत्न केले जात आहे.

मुस्लिम समाजाचे सध्या रोजे सुरू आहेत. त्यामुळे प्रचारात मुस्लिम बांधवांची संख्या फार कमी आहे. ११ मार्चला रमजान ईद आटोपल्यानंतर मुस्लिम वस्त्यांमध्ये प्रचाराचा धडाका वाढणार आहे. मुस्लिम मतदार हा काँग्रेसची परंपरागत मतपेढी मानला जातो. मात्र मुस्लिम बांधव फारसे मतदान करीत नाही. त्यातही महिला आणि मुलींची संख्या फार कमी असते. त्यामुळे एकगठ्ठा मतदान असतानाही त्याचा फायदा काँग्रेसला उचलता आलेला नाही. यावेळी ‘एमआयएम'' पक्षाने मुस्लिम उमेदवार उभा केलेला नाही. त्यामुळे काँग्रेसच्या आशा पल्लवित झाल्या आहेत.

भाजप आणि पंतप्रधान नरेंद्र मोदी प्रखर हिंदुत्वाची भाषा बोलत असल्याने मुस्लिम समाज नाराज आहे. तो भाजपला मतदान करेल असे दिसत नाही. याची भीती भाजपला सतावत आहे. भाजपच्यावतीने ताजाबादचे अध्यक्ष प्यारे खान मुस्लिमांना भाजपकडे नव्हे तर गडकरी यांच्याकडे बघून मतदान करण्याचे आवाहन करीत आहे. गडकरी यांची प्रतिमा, धर्मनिरपेक्ष राजकारण, केलेला विकास यांची माहिती ते मुस्लिम बांधवांना पटवून देण्याचे काम काम करीत आहे. (Latest Marathi News)

बोलण्याच्या ओघात प्यारे खान यांनी भाजपमुळे नव्हे तर गडकरी स्वतःच्या बळावर निवडून आले असल्याचे म्हटले आहे. त्यांच्या वक्तव्याचा हा व्हीडिओ सध्या चांगलाच व्हायरल होत आहे. काँग्रेसच्यावतीने याचे राजकरणही केले जात आहे. भाजपच्या अधिकाधिक कार्यकर्त्यांपर्यंत पोचवण्याचा प्रयत्न सोशल मीडियाच्या माध्यमातून केला जात आहे.

मध्य नागपूर विधानसभा मतदारसंघातून अनिस अहमद दोन वेळा निवडून आले होते. ते राज्यात मंत्रीसुद्धा होते. मतदारसंघ बदलवताच त्यांचे राजकारण संपुष्टात आले आहे. काँग्रेसचे उमेदवार विकास ठाकरे यांच्याही सोबत त्यांचे फारसे सौख्य नाही. पश्चिम नागपूरमध्ये उमेदवार असताना काँग्रेसच्याच काही नेत्यांनी पाडल्याचा त्यांनी खाजगीत आरोप केला होता. ते महाविकास आघाडीत आहेत. त्यांची भूमिका या निवडणुकीत महत्त्वाची राहणार आहे. (Latest Marathi News)