नागपूर - आपल्या सुनेनेच मुलाचे अपहरण करून त्याला व्यसनमुक्ती केंद्रात डांबल्याचा आरोप करीत वृद्ध आईने मुंबई उच्च न्यायालयाच्या नागपूर खंडपीठात धाव घेत मुलाचा ताबा मिळावा (हेबियस कॉर्पस) म्हणून याचिका दाखल केली. सुनावणी दरम्यान पत्नी, आईसह दुखः मुलगा हजर झाल्याने न्यायालयाने ही याचिका निकाली काढली.

न्यायमूर्ती विनय जोशी आणि न्यायमूर्ती महेंद्र चांदवानी यांच्यासमक्ष या प्रकरणाची सुनावणी झाली. याचिकेनुसार, मुलगा व सून दोघेही पती पत्नी शिक्षक आहे. दोघांचा पाच वर्षांपूर्वी लग्न झाले. मात्र, मुलाला दारूचे व्यसन असल्यामुळे व इतर कौटुंबिक कारणांमुळे सून गेल्या तीन वर्षांपासून वेगळी राहत होती. १४ सप्टेंबरला सून आणि मुलगा यांची पुयारदंड (ता. चिमूर, जि. चंद्रपूर) बसस्थानकावर भेट झाली. त्यात जवाहरनगर (जि. भंडारा) येथील व्यसनमुक्ती केंद्राचे काही कर्मचारी उपस्थित होते.

त्यांनी व सुनेने याचिकाकर्त्या आईच्या मुलाला जबरदस्तीने कारमध्ये ओढले आणि तेथून पळ काढला. हा सर्व प्रकार गावकऱ्यांच्या लक्षात येईना. त्यामुळे त्यांनी थेट जवाहरनगर (जि. भंडारा) पोलिसांना याची माहिती दिली. पोलिसांनी १९ सप्टेंबरला ही बाब याचिकाकर्त्या आईच्या निदर्शनास आणून दिली. प्राथमिक पोलिस चौकशी दरम्यान या व्यसनी मुलाला पत्नीने व्यसनमुक्ती केंद्रात दाखल केल्याचे उघड झाले. सून आणि व्यसनमुक्ती केंद्राच्या कर्मचाऱ्यांनी कुटुंबातील वाद व व्यसनमुक्ती केंद्रात दाखल करण्याबाबतची सर्व माहिती पोलिसांनी दिली.

त्यामुळे, आईला व्यसनमुक्ती केंद्राशी संपर्क साधण्याचा सल्ला त्यांनी दिला. मुलाच्या भेटीसाठी आईने २० सप्टेंबरला आपल्या मोठ्या मुलासह व्यसनमुक्ती केंद्र गाठले. मात्र, केंद्र चालकांनी व्यसनी मुलाचा ताबा देण्यास नकार दिला. त्या विरोधात आईने उच्च न्यायालयात धाव घेत याचिका दाखल केली व मुलाचा ताबा देण्याबाबत विनंती केली. सुनेतर्फे ॲड. नीलेश फुलझेले यांनी बाजू मांडली.