नागपूर : विदर्भात आज बुधवारी काही जिल्ह्यात वादळवाऱ्यासह पाऊस झाला. दरम्यान, शेतात काम करत असताना अंगावर वीज कोसळल्याने तीन मुलींचा मृत्यू झाला. तर नऊ जण जखमी झाले. तसेच वीज पडून बैलजोडी मृत्युमुखी पडली.

दिग्रस/पुसद (जि. यवतमाळ) : दिग्रस व पुसद तालुक्यात वीज कोसळून दोन मुलींचा मृत्यू झाला. यातील पुसद तालुक्यातील एक मुलगी दुसऱ्‍याच्या शेतात कामाला गेली होती. तर, दिग्रस तालुक्यातील माळहिवारा येथील सात वर्षीय चिमुकली ही आईवडिलांसह शेतातील झोपडीतच राहत होती.

माळहिवरा शेतशिवारात बुधवारी दुपारी चारच्या सुमारास वीज पडली. यात रोहिणी शंकर आगोसे (रा. माळहिवरा) या चिमुकलीचा मृत्यू झाला. दुसऱ्या घटनेत पुसद तालुक्यातील इनापूर शिवारात शेतात कापूस बियाण्यांची लागवड करताना अंगावर वीज पडून पल्लवी दिलीप चव्हाण (वय १६) या शेतमजूर मुलीचा जागीच मृत्यू झाला. तर इतर पाच जण जखमी झाले. जखमींमध्ये रेखा मधुकर राठोड (वय १७), शांता धर्मा चव्हाण (वय ६५), देवराम कनिराम चव्हाण (वय ६०) व रविना अनिल चव्हाण (वय १८) यांचा समावेश आहे.

कोरपना (जि. चंद्रपूर) : शेतात कापूस टिबण्याचे काम करीत असतानाच वीज कोसळून एक ठार, तर पाच जण जखमी झाले. ही घटना बुधवारी दुपारी साडेतीनच्या सुमारास बेलगावनजीक कोलामगुडा परिसरात घडली. मृताचे नाव गौरी खंदेराव कोडापे (वय १६, रा. बेलगाव) असे आहे. जखमींमध्ये मानकू सिडाम (वय १३), आयू कोडापे (वय १३), मनीषा आत्राम (वय १४), निर्मला मडावी (वय १८) आणि साबरी कोडापे (वय २०) यांचा समावेश आहे.

जखमींना गडचांदूर येथील ग्रामीण रुग्णालयात हलविण्यात आले आहे. बेलगाव येथील कोलामगुडा येथे कोडापे यांचे शेत आहे. त्यांच्या शेतात कापूस टिबण्याचे सध्या काम सुरू आहे. बेलगाव येथील गौरी खंदेराव कोडापे, मानकू सिडाम, आयू कोडापे, मनीषा आत्राम, निर्मला मडावी आणि साबरी कोडापे या कामावर गेल्या होत्या.

गोठ्यात बांधलेली बैलजोडीही दगावली

मारेगाव (जि. यवतमाळ) : वीज पडून गोठ्यातील बैलजोडी जागीच ठार झाली. ही घटना आज दुपारी तालुक्यातील सालई पोड (खंडणी) गावाजवळील शेतशिवारात घडली. लक्ष्मण चंडकू टेकाम (वय ५५) यांच्या शेतातील गोठ्यात बैलजोडी बांधलेली होती. दरम्यान, वीज कोसळल्याने गोठ्यातील दोन बैलांचा जागीच मृत्यू झाला. यात दोन मजुरांना किरकोळ धक्का बसला.

आईच्या डोळ्यांदेखत गेला चिमुकलीचा जीव

रोहिणी ही माळहिवरा येथील शेतात आपल्या आईसह गेली होती. दरम्यान, वादळी वाऱ्‍यासह पाऊस सुरू झाल्याने दोघीही सुरक्षित ठिकाणी जाण्यासाठी लगबगीने निघाल्या. परंतु, त्याच वेळी चिमुकलीच्या अंगावर वीज पडल्याने तिचा जागीच मृत्यू झाला. आईने एकच हंबरडा फोडला. तिच्या डोळ्यांदेखत मुलगी गेली.