नागपूर : ओमिक्रॉन व्हेरियंटचे (Omicron variant) संक्रमण अतिशय गतीने होते. पूर्वीचा व्हेरीयंट एका रुग्णापासून ५ ते ६ जण बाधित होत असत. दुसऱ्या लाटेतील ‘डेल्टा’ या व्हेरियंटने बाधित झालेल्या एका व्यक्तीपासून ९ जणांना लागण होत असे. मात्र, तिसऱ्या लाटेच्या उंबरठ्यावर असलेल्या ओमिक्रॉनने बाधित झालेला एका रुग्णापासून १५ पेक्षा जास्त लोक बाधित होण्याचा धोका वर्तविण्यात आला आहे. ‘डेल्टा’पेक्षा ओमिक्रॉनचा संक्रमण दर दीड पट (High transmission rate) जास्त (Worse than Delta) असल्याचे तज्ज्ञ सांगतात.

ओमिक्रॉनच्या संक्रमणाचा वेग अधिक असल्याने यावर नियंत्रण ठेवण्यासाठी सॅनिटायझर लावण्यापासून तर मास्कचा वापर करणे ही सवय लावण्याची गरज आहे. विशेष असे की, परदेश वारी करून आलेल्यांसाठी सक्तीचे विलगीकरण हाच पर्याय आहे. याशिवाय लसीकरणावर भर द्यावा असे सुपर स्पेशालिटी हॉस्पिटलच्या श्वसनरोग विभागप्रमुख डॉ. सुशात मेश्राम म्हणाले.

अलीकडे अनेकांचे ‘मास्क’ हनुवटीवर आले आहेत. यामुळे पुन्हा एकदा धोक्याची घंटा आहे. सध्या ओमिक्रॉनचा धोका आहेच, ही बाब लक्षात ठेवत या व्हेरियंटला रोखण्यासाठी उपाययोजना करण्यात येतील. या व्हेरीयंट हल्ला होऊ नये म्हणून प्रत्येकालाच दक्ष राहण्याची गरज आहे. दक्षिण आफ्रिकेतून ओमिक्रॉन आला असून संक्रमण जलदगतीने वाढले आहे. आपली लोकसंख्या लक्षात घेता त्या तुलनेत येथील गती अधिक असेल. यामुळे गर्दीत मिसळण्यापासून, समारंभ टाळावेत, वारंवार हात धुवावे असा सल्ला डॉ. सुशात मेश्राम यांनी दिला.

हे पाळा

• पहिल्या व दुसऱ्या लाटेचे अनुभव घेत पुढील काळात दक्ष असा

• प्रत्येकाने मास्क घालून स्वतःचा व दुसऱ्याचा बचाव करावा

• कोरोना नियंत्रणासाठी जे नियम लावण्यात येतील ते पाळले जाणे आवश्यक आहे.

• गर्दीच्या ठिकाणी जाणे टाळा, हे स्वतःसह इतरांना सांगावे