नागपूर : कोरोना काळात (Nagpur corona) महापालिकेच्या (Nagpur NMC) आरोग्य यंत्रणेचे पितळ उघडे पडल्यानंतर यंदा त्यात सुधारणेसोबतच विस्तारासाठी स्थायी समिती अध्यक्ष प्रकाश भोयर यांनी ५५ कोटींची तरतूद केली. त्यांनी आज सभागृहात २०२०-२१ या वर्षासाठी २ हजार ७९६ कोटींचा अर्थसंकल्प (Financial Budget Nagpur NMC) सादर केला. या वर्षाचा २ हजार ७९५ कोटींचा होणाऱ्या खर्चाच्या तुलनेत आरोग्यावर केवळ दोन टक्के रक्कम खर्च करण्याचे भोयर यांनी प्रस्तावित केले. आरोग्यावरील तरतूद पाहता शहरातील प्रत्येक व्यक्तीच्या आरोग्यावर फक्त १८३ रूपये खर्च करण्यात येणार आहेत. (only 2 percent budget for health in financial budget of Nagpur nmc)

महापालिकेची विशेष सभा आज ऑनलाइन पद्धतीने पार पडली. स्थायी समितीचे अध्यक्ष प्रकाश भोयर यांनी आज २ हजार ७९६ कोटींचा अर्थसंकल्प महापौर दयाशंकर तिवारी यांच्याकडे सादर केला. सभागृहात अर्थसंकल्प सादर केल्यानंतर भोयर यांनी २०२०-२१ या वर्षासाठी प्रस्तावित केलेल्या योजनांचा पेटारा उघडला.

नागपूरकरांच्या आरोग्यासाठी भरघोस तरतुदीची अपेक्षा व्यक्त केली जात होती. त्यांनी मागील वर्षीच्या तुलनेत यात वाढही केली. परंतु कोरोनासारख्या संसर्गजन्य रोगासाठी ही वाढ तोकडी ठरण्याची शक्यता आहे. मागील वर्षी ही रक्कम ३० कोटी होती. अर्थात दरडोई १०० रुपये आरोग्यावर खर्चाचे प्रस्तावित केले होते. यात त्यांनी १ हजार ऑक्सिजन सिलिंडर खरेदी करण्यात येणार असल्याचे सांगितले. यासाठी त्यांनी २ कोटींची तरतूद केली. यासाठी तातडीने निविदा काढण्यात येणार असल्याचे ते भाषणात म्हणाले.

आरोग्य सेवेसाठी मानधनावर मनुष्यबळ नियुक्तीच्या सूचनाही त्यांनी यावेळी केली. कोरोना काळात अंत्यसंस्कारासाठी जागा कमी पडल्याने दहनघाटांच्या विकास व विस्तारासाठी त्यांनी साडेसात कोटींची तरतूद केली. नागरिकांना मोतीबिंदूचे निःशुल्क ऑपरेशन राज्य सरकारच्या विविध योजनेतून तर तिरळेपणा दूर करण्यासाठी मोफत उपचार देण्यात येणार असल्याचे त्यांनी सांगितले.

याशिवाय गरीब नागरिकांसाठी महापौर जीवनावश्यक औषधी मेडिकल बॅंक सुरू करण्यात येणार आहे. यासाठी सामाजिक संस्था, व्यापारी, उद्योजकांची मदत घेतली जाणार आहे. याशिवाय कोरोना काळात आई विलगीकरणात असली तर तिच्या बाळाच्या दूधाचा प्रश्न निर्माण झाला होता. त्यामुळे आता पाचपावली सुतिकागृहात दूध बॅंक सुरू करण्याचा मानस भोयर यांनी व्यक्त केला. सिकलसेलग्रस्तांसाठी केंद्र सरकारच्या मदतीने डे केअर व संशोधन केंद्र सुरू करण्यात येणार आहे. येथे सर्व सुविधा मोफत राहतील, असे ते म्हणाले.

व्हॅक्सिन खरेदीसाठी १० कोटी

अर्थसंकल्प सादर केल्यानंतर आयोजित पत्रकारपरिषदेत महापौर दयाशंकर तिवारी यांनी आरोग्यासाठी तरतूद करण्यात आलेल्या ५५ कोटींमधूनच १० कोटी रुपये कोरोना व्हॅक्सिन खरेदीसाठी ठेवण्यात आल्याचे सांगितले. याशिवाय नगरसेवक, आमदारांकडूनही निधी मिळणार असल्याने ही रक्कम ३० कोटीपर्यंत जाईल. त्यामुळे व्हॅक्सिन खरेदीला बळ मिळणार असल्याचे ते म्हणाले.

(only 2 percent budget for health in financial budget of Nagpur nmc)