नागपूर : कोरोनामुळे सगळे अचानक थांबले. त्यामुळे वेगवेगळ्या कामांसाठी घरापासून दूर गेलेले अनेकजण बाहेरच अडकले. त्यांचे परतीचे मार्गच बंद झाले. अशा अनेकांमध्ये विदर्भातील विद्यार्थ्यांचाही समावेश आहे. एक-दोन नव्हे तब्बल अठराशे विद्यार्थी कोटा येथे अडकले आहेत. लॉकडाऊनमुळे राजस्थानच्या कोटामध्ये अडकलेल्या महाराष्ट्रातील सुमारे अठराशे विद्यार्थ्यांना परत घेऊन येण्याची तयारी सुरू झाली आहे. विद्यार्थ्यांना आणण्यासाठी एसटी महामंडळाच्या बसेस पाठविल्या जाणार आहेत. या संदर्भात राज्य आपत्ती व्यवस्थापन नियंत्रण कक्षातर्फे यासंदर्भातील सूचनाही निर्गमित केल्या असल्याची माहिती आहे.

14 दिवसांसाठी "होम क्वारंटाइन'
कोटा येथे अडकलेल्या विद्यार्थ्यांना परत आणण्यासाठी आपत्ती व्यवस्थापन मंत्री विजय वडेट्टीवार यांनी पुढाकार घेतला असून यासाठी ते प्रयत्नरत आहेत. त्यांच्या आदेशानुसार राज्य नियंत्रण कक्षाने तयारी सुरू केल्याचे सांगितले जाते. प्राप्त माहितीनुसार विद्यार्थ्यांना आणण्यासाठी 91 बसेस पाठविण्यात येणार आहेत. विदर्भातूनही बसेस पाठविल्या जातील. अकोला, अमरावती, बुलडाणा, यवतमाळ, वाशीम येथून 10 बसेस पाठवून त्यातून 190 विद्यार्थ्यांना परत आणले जाईल. भंडारा, गोंदिया, चंद्रपूर, गडचिरोली, नागपूर, वर्धा जिल्ह्यातूनही बसेस पाठविण्यात येतील. त्यातून 256 विद्यार्थ्यांना आणण्याची तयारी आहे. विद्यार्थ्यांना महाराष्ट्रात आणल्यानंतर चाचणी होईल. त्यानंतर 14 दिवसांसाठी "होम क्वारंटाइन' केले जाणार आहे.

सविस्तर वाचा - ...तर सप्टेंबरमध्ये होऊ शकते नव्या सत्राची सुरुवात

सूचना मिळाल्या नव्हत्या
विभाग नियंत्रक कार्यालयाला मात्र अद्याप यासंदर्भातील सूचना मिळाल्या नव्हत्या. मध्यवर्ती कार्यालयाने सूचना देताच चालक, वाहकासह बसेस उपलब्ध करून देण्यास बांधील आहोत. त्यानुसार बसेस उपलब्ध करून दिल्या जातील, असे विभाग नियंत्रक नीलेश बेलसरे यांनी सांगितले.