नागपूर : कोरोना आजाराशी लढण्यासाठी संपूर्ण देशात लॉकडाउन करण्यात आला आहे. लॉकडाउनची तंतोतंत अंमलबजावणी करण्याची जबाबदारी साहजीकच पोलिस विभागावर आली आहेत. सामान्य नागरिकांचा जीव सुरक्षित राहावा म्हणून ते दिवस-रात्र मेहनत घेत आहेत. सामान्यांच्या सुरक्षेसासाठी स्वतःचा जीव धोक्यात टाकण्यासाठी ते मागे हटत नाहीच. तरीदेखील काही आगाऊ लोक त्यांना सहकार्य करण्याऐवजी त्यांच्याशी वाद घालत आहेत. काही जण तर त्यांच्यावर हात उगारण्यास देखील विचार करत नाहीत. अशीत एक दुर्दैवी घटना नागपूरच्या कामठी परिसरात घडली.

लॉकडाऊनचे उल्लंघन करून बाहेर फिरणाऱ्या दोन भावंडावर कारवाई केल्यामुळे चिडलेल्या आरोपींनी पोलिस उपनिरीक्षकाला जबर मारहाण केली. ही घटना नवीन कामठी पोलिस ठाण्याच्या हद्दीत शनिवारी सायंकाळी 7.30 वाजताच्या सुमारास घडली. कैलास रामराव मुळे (32) आणि राकेश रामराव मुळे (30) रा. दुर्गा सोसायटी, कामठी असे आरोपी भावंडांची नावे आहेत. 

- 'तो' बरा होण्याची वाट पाहू अन्‌ आम्ही तिघेही सोबत घरी जाऊ, त्यांनी केला संकल्प...

पोलिसांनी दिलेल्या माहितीनुसार, नवीन कामठी पोलिस ठाण्यात नेमणुकीवर असलेले पोलिस उपनिरीक्षक धोंगडे (39) हे न्यू येरखेडा, दुर्गा सोसायटी चौकात शनिवारी सायंकाळी लॉकडाऊन बाबत कर्तव्य बजावत होते. दरम्यान कैलास आणि राकेश हे चौकात आले. त्यांनी संचारबंदी आणि लॉकडाऊनचे उल्लंघन केले. त्यामुळे कर्तव्यावर असलेले पीएसआय आणि त्यांच्या सहकाऱ्यांनी याबाबत चौकशी केली असता दोन्ही भावंडांनी पीएसआय धोंगडे यांची कॉलर पकडून जबर मारहाण केली. पोलिसांनी अतिरिक्‍त स्टाफ बोलावला. दोघांनाही ताब्यात घेण्यात आले. त्यांच्यावर शासकीय कामात अडथळा निर्माण केल्याप्रकरणी तसेच विविध कलमान्वये गुन्हा दाखल करून दोन्ही भावंडांना अटक केली.