नागपूर : कडाक्याच्या थंडीसाठी प्रसिद्ध असलेला डिसेंबर महिना उंबरठ्यावर असल्याने विदर्भात हळूहळू थंडीचा कडाका वाढू लागला आहे. गेल्या दोन दिवसांत नागपूरच्या तापमानात तब्बल सहा अंशांची घसरण होऊन, पारा यंदाच्या हिवाळ्यात प्रथमच १३ अंशाच्या खाली आला असल्याचे प्रादेशिक हवामान विभागातर्फे सांगण्यात आले.

उत्तर भारतातील पहाडी भागांत बर्फवृष्टी सुरू असल्यामुळे विदर्भात अचानक गारठा वाढला आहे. त्यामुळे दोन दिवसांपूर्वी १८.३ अंशांवर असलेला पारा घसरून आज १२.४ अंशांवर आला. रविवारी नागपुरात नोंद झालेले किमान तापमान यंदाच्या हिवाळ्यातील नीचांकी ठरले. विदर्भात सर्वात कमी तापमानाची नोंद यवतमाळ येथे १२ अंश सेल्सिअस इतकी करण्यात आली.

गोंदिया (१२.८ अंश सेल्सिअस), वर्धा (१३.९ अंश सेल्सिअस), अमरावती (१४ अंश सेल्सिअस), चंद्रपूर (१४ अंश सेल्सिअस) व ब्रम्हपुरी (१४.३ अंश सेल्सिअस) येथेही पाऱ्यात लक्षणीय घट झाली. सायंकाळ होताच हवेत गारठा निर्माण होतो. पहाटेच्या सुमारास थंडीची तीव्रता आणखीनच वाढते. डिसेंबरच्या पहिल्या आठवड्यात थंडीचा जोर वाढण्याची शक्यता आहे.