भंडारा : नवेगाव-नागझिरा व्याघ्र प्रकल्पात सोडण्यात आलेल्या नवीन वाघिणीचे सॅटेलाईट जीपीएस कॉलर अभयारण्यात आढळून आले. यामुळे वन्यजीव विभागाच्या पथकांद्वारे तिचा युद्धस्तरावर शोध घेण्याची मोहीम राबविण्यात आली. आज सकाळी या एनटी-३ वाघिणीचा ठावठिकाणा शोधून तिच्या गळ्यात पूर्ववत जीपीएस कॉलर लावून जंगलात सोडण्यात आले आहे.

नवेगाव-नागझिरा व्याघ्र प्रकल्पात वाघांचे संवर्धन व स्थानांतरण या उपक्रमाअंतर्गत दुसऱ्या टप्प्यात ताडोबा-अंधारी व्याघ्र प्रकल्पातील एनटी-३ वाघीण ११ एप्रिलला सायंकाळी नवेगाव-नागझिरा व्याघ्र प्रकल्पाच्या गाभा क्षेत्रातील नागझिरा अभयारण्याचे कक्ष क्रमांक ९५ मध्ये निसर्गमुक्त करण्यात आले होते.

त्यानंतर १२ एप्रिलला या वाघिणीच्या जीपीएस कॉलरचे सिग्नल ती एकाच ठिकाणी असल्याचे दाखवीत होते. त्यामुळे १३ एप्रिलला नवेगाव-नागझिरा व्याघ्र प्रकल्पातील व्हीएचएफ चमू, क्षेत्रीय अधिकारी-कर्मचारी यांच्याकडून शोध मोहीम राबविण्यात आली. यात या वाघिणीची सॅटेलाईट जीपीएस कॉलर चालू स्थितीमध्ये नागझिरा अभयारण्यातील कक्ष क्रमांक ९५ मध्ये जमिनीवर पडलेली आढळली.

यानंतर वाघिणीचा शोध घेण्यासाठी वरिष्ठ अधिकारी आणि तज्ज्ञांच्या मार्गदर्शनाखाली व्याघ्र प्रकल्पातील व्हीएचएफ चमू व क्षेत्रीय अधिकारी-कर्मचारी यांच्याकडून शोधमोहीम राबविण्यात आली. आज सोमवारी (ता. १५) सकाळी नागझिरा अभयारण्यात या वाघिणीचा शोध घेण्यात आला. त्यानंतर सकाळी सुमारे साडेनऊ वाजता वाघिणीला बेशुद्ध करून पुन्हा सॅटेलाईट जीपीएस कॉलर लावून त्याच ठिकाणी निसर्गमुक्त करण्यात आले.

शेवट सुखद झाला

या वाघिणीला नागझिरा अभयारण्यात सोडण्यात आल्यावर दुसऱ्याच दिवशी तिच्या गळ्यातील कॉलर जंगलात पडलेले आढळल्याने व्याघ्र प्रकल्प आणि वन्यजीव विभागाच्या अधिकारी कर्मचाऱ्यांच्या विविध विचारांचे काहूर माजले होते. त्यानंतर परिसराची तपासणी केली तेव्हा कोणत्याही घातपाताचे चिन्ह न दिसल्याने त्यांनी सुटकेचा श्‍वास सोडला. दोन दिवसानंतर ही वाघीण आढळली व तिच्या गळ्यात पुन्हा कॉलर लावल्याने या प्रकरणाचा शेवट सुखद झाला, असे म्हणत सगळ्यांनी सुटकेचा निःश्वास सोडला.