नागपूर : 'पक्षाने पुन्हा एकदा माझ्यावर विश्‍वास दाखवला आहे. आता मी गेल्या निवडणुकीपेक्षा जास्त मताधिक्‍य घेऊन जिंकेन', असा विश्‍वास केंद्रीय मंत्री नितीन गडकरी यांनी आज (गुरुवार) व्यक्त केला. लोकसभा निवडणुकीसाठी भाजपने पहिली यादी आज सायंकाळी जाहीर केली. या यादीची घोषणा करताना गडकरी यांचे तिसरे नाव घेण्यात आले, हादेखील एक सूचक बदल मानला जात आहे. 

भाजपचे ज्येष्ठ नेते जे. पी. नड्डा यांनी पत्रकार परिषदेमध्ये एकूण 184 उमेदवारांची यादी जाहीर केली. त्यामध्ये सर्वांत पहिले नाव पंतप्रधान नरेंद्र मोदी यांचे होते. त्यानंतर गृहमंत्री राजनाथसिंह यांच्या मतदारसंघाची घोषणा करण्यात आली. त्यानंतर गडकरींचा मतदारसंघ जाहीर करण्यात आला. 

गडकरी यंदा पुन्हा नागपूरमधून निवडणूक लढविणार आहेत. त्यासंदर्भात गडकरी म्हणाले, 'पक्षाने माझ्यावर विश्‍वास दाखवला आहे. नागपूरच्या जनतेने गेल्या निवडणुकीमध्ये मला साथ दिली होती. आमच्या कामावर जनता समाधानी आहे. पुन्हा निवडून आल्यावर आम्ही यापेक्षा चांगली कामगिरी करू. आता मी गेल्या निवडणुकीपेक्षा जास्त मताधिक्‍याने जिंकणार आहे.'' नितीन गडकरी यांच्याविरोधात नागपूरमधून काँग्रेसने नाना पटोले यांना उमेदवारी दिली आहे. 

2014 मधील लोकसभा निवडणुकीमध्ये गडकरी यांना 5,87,767 इतकी मते मिळाली होती. त्यांच्याविरोधातील काँग्रेसच्या विलास मुत्तेमवार यांना 3,02,939 इतकी मते मिळाली होती. गडकरींनी या निवडणुकीमध्ये 2,84,828 इतक्‍या मताधिक्‍याने विजय मिळविल्या होत्या. 

अडवानींचा पत्ता मोदी-शहांनी केला कट

लोकसभेसाठी भाजपची पहिली यादी जाहीर