अमरावती : एका सहायक पोलिस उपनिरीक्षकाने पत्नीच्या चारित्र्यावर संशय घेऊन पत्नी व तीन उच्च शिक्षित मुलांना घरात डांबून जबर मारहाण केली. गाडगेनगर पोलिसांनी पुढाकार घेतल्याने तीन ते चार तासांनंतर त्यांची सुटका झाली. बंदोबस्तात व्यस्त असलेल्या पोलिस अधिकारी, कर्मचाऱ्यांना त्यासाठी चांगलाच घाम गाळावा लागला. धुमाकूळ घालणारे ए.एस.आय. हे अमरावती ग्रामीण पोलिस दलात कार्यरत आहेत. त्यांची तीनही मुले उच्चशिक्षित आहेत. काही दिवसांपासून पोलिस दलात कार्यरत या ए.एस.आय.चे पत्नी व मुलांसोबतचे वागणे अचानक बदलले. पती, पत्नी वार्धक्‍याकडे झुकत असतानाही त्याने तिच्या चारित्र्यावर संशय घेऊन, शारीरिक, मानसिक छळणे सुरू केले होते.
शुक्रवारी (ता. 11) सायंकाळी या पोलिस अधिकाऱ्याने पुन्हा पत्नीसोबत वाद घातला. शिवीगाळ केली. एवढ्यावर त्याचे समाधान झाले नाही. तीनही उच्चशिक्षित मुलांसह पत्नीला स्वत:च्या घरात डांबून ठेवले. त्यानंतर त्यांना जबर मारहाण केली. काही वेळानंतर हे अधिकारी पत्नी, मुलांना घरातच ठेवून बाहेर आले. परिसरातील नागरिकांनी घटनेची माहिती गाडगेनगर पोलिसांना दिली. यावेळी पोलिस दुर्गादेवी मूर्ती विसर्जन मिरवणुकीसह निवडणूक बंदोबस्तात व्यस्त होते. त्यामुळे परिसरात फिरणाऱ्या सी. आर. व्हॅनमधील कर्मचाऱ्यांनी त्या पोलिस अधिकाऱ्याची समजूत काढण्याचा प्रयत्न केला. त्यानंतर गाडगेनगर ठाण्यातील दोन अधिकारी तेथे पोहोचले. परंतु तो पोलिस अधिकारी त्यांची सुटका करण्याच्या मन:स्थितीत नव्हता. पोलिस निरीक्षक मनीष ठाकरे मध्यरात्री बाराच्या सुमारास तेथे दाखल झाले. त्यांनी अखेर त्या एएसआयची समजूत काढून पत्नी व मुलांना सुखरूप बाहेर काढले. पत्नीच्या तक्रारीवरून गाडगेनगर ठाण्यात सहायक पोलिस उपनिरीक्षक पतीविरुद्ध कौटुंबिक हिंसाचाराचा गुन्हा दाखल झाला.