एटापल्ली (जि. गडचिरोली) : तालुक्‍यातील सुरजागड लोहखनिज पहाडी परिसरात नक्षलवाद्यांनी पत्रके टाकून जहाल महिला नक्षलवादी रामको व शिल्पाच्या हत्येवर संशय व्यक्त केला आहे. दोघींचीही हत्या चकमक किंवा बॉम्बस्फोटात झाली नसून पोलिसांनी त्यांना पकडून जीवे मारले, असे पत्रकातून म्हटले आहे.
शनिवारी (ता. 27) दुपारी साडेबाराच्या सुमारास गुंडूरवाही व पुलनार गावांच्या जंगल परिसरात पोलिस व नक्षल्यांमध्ये चकमक झाली होती. यात रामको व शिल्पा अशा दोन जहाल महिला नक्षलवादी ठार झाल्या होत्या. मात्र, नक्षलवाद्यांनी संशय घेत अशी कोणतीही चकमक झाली नसून दोन्ही महिला जीवनावश्‍यक साहित्य खरेदी करून गुंडूरवाही व पुलनार गावांच्या जंगल परिसरातून कोणत्याही शस्त्राशिवाय जात असताना पोलिसांच्या सी-60 पथकाने त्यांना ताब्यात घेऊन निर्दयीपणे त्यांची हत्या केली, असा आरोप गोंडी व माडिया भाषेतील पत्रकातून करण्यात आला आहे. अशा खोट्या कृत्याचा विरोध करण्याचे तसेच कसनासूर व बोरिया जंगल परिसरात पोलिसांनी ठार केलेल्या 40 माओवाद्यांच्या हत्येचा बदला घेण्यासाठी चळवळीत सहभागी होण्याचे आवाहनसुद्धा पत्रकातून करण्यात आले आहे. पत्रकात भारतीय कम्युनिस्ट पार्टी (माओवादी) असा उल्लेख आहे.