सिरोंचा (जि. गडचिरोली) : येथील सिरोंचा नगरपंचायत हद्दीतील प्रभाग क्र 8, 9, 10 या वार्डांत सीसी रोडचे काम सुरू आहे. मात्र या रस्त्याच्या कामात मातीमिश्रित वाळू आणि निकृष्ट दर्जाची गिट्टी वापरली जात असल्याने बांधकामाचा दर्जा घसरल्याचा आरोप शिवसेनेचे माजी तालुकाध्यक्ष अमित तिपट्टी यांनी केला आहे.

या रस्त्याबद्दल माहिती देताना माजी तालुकाध्यक्ष तिपट्टी म्हणाले की, शहरातील रस्त्याचा विकास करण्यासाठी सरकारकडून लाखो रुपयांचा निधी दिला जात आहे. पण संबंधित अधिकाऱ्यांच्या दुर्लक्षामुळे या रस्त्याच्या कामात निकृष्ट दर्जाची गिट्टी व वाळूचा वापर होत असल्याने भविष्यात रस्ता उखडून जाण्याची शक्‍यता आहे.

नगरपंचायतीचा कानाडोळा

असे असतानाही या कामाकडे नगरपंचायत डोळेझाक करत असल्याचे दिसून येत आहे. नगरपंचायतीच्या इमारतीपासून अगदी हाकेच्या अंतरावर हे काम चालत असले, तरी कामावर जाऊन वापरण्यात येणाऱ्या वाळू व गिट्टीचा दर्जा पंचायत समितीचे अधिकारी किंवा पदाधिकारी पाहत नाहीत. त्यावरूनच विकासकामांच्या बाबतीने नगरपंचायतीचा दृष्टिकोन कसा आहे, याची जाणीव होते.

बांधकामाची चौकशी करा

सिरोंचा शहरातील 8,9,10 क्रमांकाच्या वॉर्डांत सुरू असलेल्या निकृष्ट दर्जाच्या सीसी रोडच्या बांधकामाची चौकशी करण्यात यावी, अशी मागणी शिवसेनेचे माहिती तालुकाध्यक्ष तिपट्टी यांनी नगरपंचायतीचे मुख्याधिकारी आणि सिरोंचा येथील तहसीलदार यांना निवेदनाद्वारे केली आहे.

जाणून घ्या : विकासकामांच्या श्रेयासाठी राजनगरीत रंगतोय कलगीतुरा, आजी-माजी आमदारांमध्ये जुगलबंदी सुरू

दोषींवर होणार कारवाई

या रस्त्याबद्दलच्या आरोपांसंदर्भात मुख्याधिकारी विशाल पाटील यांच्याशी संपर्क साधला असता त्यांनी आपण या प्रकरणाची गंभीर दखल घेतली असल्याचे सांगितले. यासंदर्भात होत असलेले आरोप व तक्रारींची शहानिशा करून या कामाची चौकशी करू. या कामाबाबत काही दोष आढळून आल्यास संबंधित दोषींवर तत्काळ कारवाई करण्यात येईल. शिवाय या कामाचे त्रयस्थ लेख परीक्षण करण्यात येईल, असेही त्यांनी सांगितले.

(संपादन : दुलिराम रहांगडाले)