नागपूर - "राष्ट्रीय स्वयंसेवक संघ आणि भाजप सत्तेत येण्यापूर्वी स्वतःला हिंदू राष्ट्राच्या संकल्पनेचे पाईक सांगायचे. मात्र, आता संघ मुस्लिमांच्या सहभागाची भाषा बोलू लागला आहे आणि पंतप्रधान नरेंद्र मोदी मुस्लिम मतांसाठी मशिदीत जात आहेत. संघ आणि भाजपने हिरवा रंग जवळ करून भगव्याशी फारकत घेतली आहे,' अशी बोचरी टीका आंतरराष्ट्रीय हिंदू परिषदेचे अध्यक्ष प्रवीण तोगडिया यांनी आज येथे पत्रकार परिषदेत केली.

आंतरराष्ट्रीय हिंदू परिषदेच्या कार्यकर्ता मेळाव्यासाठी नागपुरात आले असताना त्यांनी पत्रकारांशी संवाद साधला. प्रवीण तोगडिया म्हणाले, "अयोध्येत राम मंदिर व्हावे ही सर्व हिंदूंची इच्छा आहे. राष्ट्रीय स्वयंसेवक संघ आणि भाजपचाही तोच अजेंडा होता. मात्र, सत्ता मिळताच सरकारने राम मंदिराचा प्रस्ताव बाजूला ठेवला. चार वर्षांत एकदाही या मुद्यावर सरकारने भूमिका स्पष्ट केली नाही. राम मंदिराच्या मुद्यावर आंदोलन करणाऱ्यांना बाजूला करण्यास सुरवात केली. राम मंदिर मुद्यावर संसदेत कायदा करावा, अशीच आमची मागणी आहे. त्याचा आराखडा आमच्याकडे तयार आहे. मात्र, सरकारला अनुसूचित जाती/जमातींच्या कायद्यात अधिक रस आहे. संघालाही हेडगेवार आणि गोळवलकर गुरुजींच्या हिंदुत्वाचा विसर पडला आहे.'

बाळासाहेब ठाकरेच आदर्श
हिंदू राष्ट्राच्या संकल्पनेवर शिवसेना तयार झाली. त्या वेळी राम मंदिरासाठी बाळासाहेब ठाकरे यांनी भगव्या झेंड्याखाली सर्वांना एकत्र आणले. त्यामुळे ते आपले आदर्श असल्याचे प्रवीण तोगडिया म्हणाले. मोदी सरकारला हिंदू राष्ट्राचे स्वप्न साकारता येणार नसेल तर उद्धव ठाकरे यांच्या नेतृत्वात भगवा हातात घेऊन ते साध्य करावे, असेही आवाहन त्यांनी केले.