नागपूर - ‘निमंत्रण-वापसी’च्या घटनेनंतर चहुबाजूंनी आरोपाच्या फैरी झडल्यामुळे अखिल भारतीय मराठी साहित्य महामंडळाचे अध्यक्ष डॉ. श्रीपाद भालचंद्र जोशी यांनी आज आपल्या पदाचा राजीनामा दिला.

मंगळवारी रात्रीपर्यंत संमेलनाच्या उद्‌घाटकाचा शोध घेण्याच्या प्रक्रियेत डॉ. जोशी व्यग्र होते. मात्र, यादरम्यान संपूर्ण घडामोडींनी अस्वस्थ झालेल्या महामंडळाच्या अध्यक्षांनी आपल्या एका सहकाऱ्याकडे अश्रूंना वाटही मोकळी करून दिली आणि राजीनाम्याचे सूतोवाचही केले होते. त्यांनी आज सकाळी विदर्भ साहित्य संघाच्या अधिकृत ‘ई-मेल’वर राजीनामा पाठवला. ‘‘घडलेल्या प्रकारासाठी कुणीही जबाबदार असले तरी नैतिक जबाबदारी स्वीकारून हा राजीनामा देत आहे,’’ असे त्यांनी म्हटले आहे. याशिवाय तीन वर्षांच्या कार्यकाळात आपल्याला दिलेल्या सहकार्याबद्दलही त्यांनी महामंडळ व सर्व घटक संस्थांचे आभार मानले आहेत. 

राजीनाम्याची एक प्रत त्यांनी महामंडळाच्या उपाध्यक्ष विद्या देवधर यांना पाठविली आहे. प्रत मिळाल्याचे देवधर यांनी स्पष्ट केले. घटनेनुसार अध्यक्षांनी राजीनामा दिल्यास उपाध्यक्षांकडे पदाची जबाबदारी येते. त्यामुळे यवतमाळच्या साहित्य संमेलनात विद्या देवधर महामंडळाचे नेतृत्व करतील. याशिवाय उद्या (गुरुवारी) दुपारी दोन वाजता अखिल भारतीय मराठी साहित्य महामंडळाच्या कार्यकारिणीची बैठक यवतमाळ येथे संमेलनस्थळी होणार आहे. त्यामुळे या बैठकीकडेही सर्वांचे लक्ष आहे. 

कारस्थान रचून मला बळीचा बकरा बनविण्यात आले; परंतु त्याचा राग संमेलनावर काढणार नाही. मी संमेलनाला जाणार आहे आणि आपणही संमेलनाला यावे.
- डॉ. श्रीपाद भालचंद्र जोशी