अमरावती : बडनेराच्या गांधी विद्यालयाजवळ रेल्वेपुलानजीक नेर आगाराच्या एसटीने दुचाकीस्वार युवकास मागील चाकात चिरडल्याने त्याचा जागीच मृत्यू झाला. शुभम अविनाश वाठ (वय 19 माळीपुरा, बडनेरा) असे मृत युवकाचे नाव असल्याचे पोलिसांनी सांगितले.
नेर आगाराची एमएच 40 वाय 5287 क्रमांकाची एसटी अमरावतीहून नेरकडे जात असताना बडनेरातील गांधी विद्यालयाजवळ एमएच 27 सीजी 3924 क्रमांकाच्या दुचाकीने शुभम वाठ हा निघाला. शुभमने एसटीच्या समोर जाण्याचा प्रयत्न केला असता, मागील चाकाखाली येऊन चिरडल्यामुळे त्याचा जागीच मरण पावला. अपघातानंतर रेल्वेपुलाजवळ वाहतूक विस्कळीत झाली. जमाव होत असल्याचे बघून बडनेरा पोलिसांनी एसटी चालकास ताब्यात घेऊन, मृतदेह तातडीने इर्विनमध्ये उत्तरीय तपासणीसाठी पाठविला. मृत युवकाचे वडील अविनाश वसंत वाठ यांच्या तक्रारीवरून बडनेरा पोलिसांनी एसटी चालक भीमराव मधुकर बागडे विरुद्ध गुन्हा दाखल करून, त्याला अटक केली. रस्त्यावर मोठ्या प्रमाणावर रक्त पडल्यामुळे पोलिस पंचनाम्यानंतर अग्निशमन दलाला येथे पाचारण करण्यात आले होते.