पचखेडी  (नागपूर)  : उमरेड-कऱ्हांडला अभयारण्याच्या गोठणगाव प्रवेशद्वारावर सध्या पर्यटकांची चांगलीच गर्दी झाली आहे. अभयारण्यातील "टी-थ्री' वाघिणीने चार पिलांना जन्म दिला आहे. या चारही शावकासह वाघिणीचा मुक्तसंचार उमरेड-कऱ्हाडला अभयारण्याला भेट देणाऱ्यांसाठी आकर्षण ठरले आहे.
उमरेड-कऱ्हांडला अभयारण्यातील "जय' हा यापूर्वीच आशिया खंडातील सर्वांत मोठा आणि रुबाबदार वाघ म्हणून प्रसिद्धीच्या झोतात आला होता. जयच्या दर्शनासाठी देश-विदेशातील विविध क्षेत्रातील सेलीब्रेटिंनी उमरेड-कऱ्हांडला अभयारण्याला भेटी दिल्या. जयच्या मृत्यूनंतर पर्यटकांचा ओघ कमी झाला. जयचे शावक असलेले बिट्टू व श्रीनिवास यांना पाहण्यासाठी पर्यटक येत होते.
मागील दोन महिन्यांपूर्वी अभयारण्यातील "टी-थ्री' (पूर्वीची टी-सिक्‍स) या फेरी वाघिणीने चार शावकांना जन्म दिला. अभयारण्याच्या गोठणगाव परिसरात तिचा चारही शावकासह मुक्त संचार सुरू आहे. हे शावक जयचे वंशज असू शकतात असेही मत वन्यजीवप्रेमी व्यक्त करीत आहेत. टी-थ्री वाघिण चार शावकासह जंगलातील पाणवठ्याच्या ठिकाणी हमखास पर्यटकांना दर्शन देत असल्याने वन्यप्रेमींचा ओघ वाढला आहे. अनेकदा गोठणगाव प्रवेशद्वारावर हाऊसफुल्ल असा बोर्ड लावण्यात येतो असेही मत स्थानिकांनी व्यक्त केले. अभयारण्यानजीकच्या अनेक गावात पर्यटकांच्या वाढीमुळे रोजगारांत वाढ झाली आहे.