अमरावती : तब्बल दोन आठवडे बंद राहिलेली बाजार समिती गुरुवारपासून (ता. चार) नियमित सुरू झाल्याने शेतकऱ्यांसह अडते, खरेदीदार, हमाल व मापारी यांनी समाधान व्यक्त केले. धान्याच्या खरेदी-विक्रीचे व्यवहार सुरू झाले असून तुरीला सात हजार, तर चन्याला चार हजार 950 रुपये प्रतिक्विंटल महत्तम भाव मिळाला. 

कोरोना संक्रमणाच्या पार्श्‍वभूमीवर लागू झालेल्या लॉकडाउनमुळे कृषी उत्पन्न बाजार समितीमधील धान्य बाजार बंद करण्यात आला होता. 21 फेब्रुवारीपासून बाजार बंद केल्या गेल्याने शेतकऱ्यांसह हमाल व मापाऱ्यांची मोठी अडचण झाली होती. खरिपातील तूर, सोयाबीन व रब्बी हंगामातील चना या शेतमालाची आवक यावेळी बाजारात चांगली होती. मात्र, तिला खीळ बसली. बाजार बंद झाल्याने आवक बंद होण्यासोबतच खरेदी-विक्रीचे व्यवहार ठप्प पडून आर्थिक उलाढाल बंद झाली होती.

हेही वाचा - मार्च महिन्यातच पारा वरचढ, कूलरही निघाले बाहेर; जलवाहिनी नसलेल्या भागात वाढतेय समस्या

संचालक मंडळाने जिल्हाधिकाऱ्यांसोबत चर्चा करून कोरोना नियमांचे पालन करीत बाजार सुरू करण्याची विनंती केली. एक मार्चला जिल्हाधिकाऱ्यांनी परवानगी दिल्यानंतर गुरुवारी (ता. चार) बाजार सुरू करण्यात आला. पहिल्याच दिवशी तुरीच्या 1352, सोयाबीनच्या 1854, चन्याच्या 5 हजार 889, गहू 189 व मुगाच्या सहा पोत्यांची आवक नोंदविल्या गेली. शेतकऱ्यांनी बाजारात आणलेल्या लाल तुरीला पहिल्या दिवशी 6550 किमान व 7 हजार रुपये कमाल भाव मिळाला. चन्यालाही हमीदराच्या तुलनेत चढे दर मिळाले असून 4500 ते 4 हजार 950 रुपयांना खरेदी झाली. मुगास सहा ते सात हजार व गव्हाला (लोकवन) 1800 ते 1950 रुपये प्रतिक्विंटल भाव मिळाला.

हेही वाचा - धोक्याची घंटा! दर महिन्याला ९ अल्पवयीन मुलींचा गर्भपात...

बाजार उघडल्याने शेतकऱ्यांनी समाधान व्यक्त केले आहे. बाजारातील शेतमालातील तेजी सध्यातरी कायम असल्याने शेतकऱ्यांच्या पदरी थोडा पैसा पडू लागला आहे. बाजार सुरू करण्यापूर्वी उपसभापती नाना नागमोते, सहकार विभागाचे तालुका उपनिबंधक भुयार, पारिसे, पुरी, बाजार समितीचे सचिव दीपक विजयकर, सहसचिव भुजंग डोईफोडे यांनी कोरोना नियमांची माहिती सर्वांना दिली. मास्क बांधणे अनिवार्य असून निर्जंतुकीकरण व सोशल डिस्टन्स या त्रिसूत्रीचे पालन करण्याचे आवाहन या वेळी करण्यात आले आहे.