मांढळ - नजीकच्या वग-विरखंडी येथील आमनदीच्या पात्रात पोहायला गेलेल्या दोन किशोरवयीन मुलांचा बुडून मृत्यू झाल्याची घटना मंगळवारी सायंकाळी घडली. सुजल रामकृष्ण डहाके (वय १४) व दिशांत किशोर शास्त्रकार (वय १४, दोघेही रा. वग) अशी मृतांची नावे आहेत. 

बुडून मृत्यू झालेली दोन्ही मुले वग येथील बालाजी पाटील हायस्कूलचे इयत्ता आठवीचे विद्यार्थी आहेत. मंगळवारी मांढळचा बाजार असल्याने शाळेला लवकर सुटी देण्यात आली होती. सायंकाळी ५.३० वाजताच्या सुमारास वग येथील सहा मित्र आमनदीच्या पात्रात पोहायला गेले होते. पोहत असताना सुजल व दिशांत नदीच्या धारेला लागले. तग धरता न आल्याने नदीच्या धारेतील डोहात बुडाले. यानंतर सोबतच्या मुलांनी गावाकडे पळ काढला. नदीपात्राकडून परतणाऱ्या शेतमजूर महिलांना नदीकाठावर मुलांचे कपडे व सायकली पडून दिसल्या. त्यांनी गावकऱ्यांना ही माहिती दिली. माहिती मिळताच गावकऱ्यांनी नदीकडे धाव घेतली. काही युवकांनी नदीत उतरून शोध घेतल्यावर डोहातील गाळात दोघांचे मृतदेह आढळून आले. दरम्यान, कुही पोलिसांना माहिती देण्यात आली. कुहीचे ठाणेदार जगदीश गायकवाड व सहायक पोलिस उपनिरीक्षक द्वारकानाथ गोंदके चमूसह घटनास्थळी दाखल झाले. दोन्ही मुलांच्या मृतदेहाचा पंचनामा करून दोघांचेही प्रेत उत्तरीय तपासणीसाठी कुही येथे पाठविण्यात आले.

गावात शोककळा 
सुजल एकुलता मुलगा आहे तर दिशांत त्याचे मामा हिंगणकर यांच्याकडे राहत होता. दोन्ही मुले अभ्यासात हुशार होती. मागील पंधरवड्यातच त्याचे मामा व आजोबा मरण पावले होते. या घटनेमुळे दोन्ही कुटुंबावर दुःखाचा डोंगर कोसळला असून गावात शोककळा पसरली आहे.