रामटेक (जि. नागपूर)  : भरधाव पिकअप वाहनाने दिलेल्या धडकेत दुचाकीस्वार माय-लेकाचा जागीच मृत्यू झाला. ही दुर्दैवी घटना आज मंगळवारी दुपारी रामटेकनजीकच्या दुधाळा येथे घडली. अपघातानंतर रामटेकच्या एका तरुणाने पळून जाणाऱ्या चालकाचा पाठलाग करून पकडले व पोलिसांच्या हवाली केले.
राजू नत्थुजी मेहरकुळे (45, रा. दुधाळा) असे मुलाचे तर निलाबाई (60) असे मृत आईचे नाव आहे. राजू हा आईसह दुचाकीने निमखेडा येथे मामाच्या घरी जात होता. गावानजीच्या शनीमंदिराच्या थोडे अलीकडे नगरधनवरून रामटेककडे भरधाव येणाऱ्या पिकअप वाहनाने त्यांच्या दुचाकीला धडक दिली. यात आई निलाबाई जागीच ठार झाल्या. तर रुग्णालयात घेउन जाताना राजूचा मृत्यू झाला. अपघातानंतर आरोपी वाहनचालकाने पळून जाण्याचा प्रयत्न केला. त्याचवेळी रामटेकच्या शनिवारी वार्डातील अमित बालाजी नागपुरे या तरुणाने दुचाकीने पाठलाग करीत वाहनाला अडविण्याचा प्रयत्न केला. मात्र आरोपी वाहनचालकाने त्याच्यावर गाडी चढविण्याचा प्रयत्न केला. आरोपीने चिचाळा मार्गाकडे वाहन वळवताच रस्त्याच्या खाली वाहन उतरवून थांबला. येथून पळून जाण्याचा प्रयत्न करताना तरुणाने त्यास पकडून पोलिसांच्या हवाली केले. रामटेक पोलिसांनी या प्रकरणी गुन्हा नोंद केला असून आरोपी पिकअप वाहनचालक गोपाल महादेव चौधरी (रा. तारसा) यास अटक केली. त्याची रामटेक उपजिल्हा रुग्णालयात तपासणी करण्यात आली. मृत राजू मेहरकुळे हा घरातील कमावता होता. त्याच्या पश्‍चात पत्नी, मुलगा व मुलगी आहे.