दारव्हा (यवतमाळ) : तालुक्यातील तरणोळी येथील मोबाइल टॉवरच्या बॅटर्‍या चोरणार्‍या दोघांना मंगळवारी (ता.5) सकाळी चिखली गावातून अटक केली. या कारवाईत दोन लाख 59 हजार 968 रुपयांच्या 48 बॅटर्‍या व आठ लाखांची तवेरा गाडी असा एकूण दहा लाख 59 हजार 968 रुपयांचा मुद्देमाल जप्त करण्यात आला. या गुन्ह्यातील दोन चोरटे फरार असून, दारव्हा पोलिस त्यांचा शोध घेत आहेत.

पोलिस सूत्रांनी सांगितल्यानुसार मंगळवारी पहाटे सव्वादोनला तरणोळी गावातील मोबाईल टॉवरचा अलार्म वाजला. याबाबतची माहिती सुरक्षा सुपरवायझर ओंकार जाधव (रा.यवतमाळ) यांनी देताच दारव्हा पोलिस लगेच घटनास्थळी पोहोचले. पोलिसांना पाहताच एम. एच. 26 एफ. 1000 या क्रमांकाच्या तवेरा वाहनातून चालक गाडी सोडून पळाला. सोबत गाडीमधील इतर तीन संशयितही पळून गेले. त्यानंतर पोलिस दारव्ह्याकडे परत येत असताना चिखली गावात तीन अनोळखी व्यक्ती दिसून आले. त्यांना विचारपूस केली असता, त्यांनी पळ काढला. त्यांचा पाठलाग करीत संशयित रजाकत इस्राईल खान (वय 40, रा. हिवरखेड ता. तेल्हारा जि. अकोला) व मोहम्मद शफीउल्ला खान (रा. अकोट. जि. अकोला) या दोघांना पकडण्यात पोलिसांना यश आले, तर संशयित इम्रान अली शहारत अली (वय 35, रा अकोट) व शेख वकील शेख रफिक (वय 20, रा. हिवरखेड ता. तेल्हारा) हे पळून जाण्यास यशस्वी झाले.

यावेळी चोरट्यांकडून एक लाख 29 हजार 984 रुपयांच्या 24 बॅटर्‍या व आठ लाखांची तवेरा गाडी पोलिसांनी जप्त केली. ठाणेदार रिता उईके यांच्या मार्गदर्शनाखाली उपनिरीक्षक संजय शिंदे, व्यंकटेश मच्छेवार , निवृत्ती कुळशिंगे, विशाल गेडाम, इमाम चौधरी, गोपाल अकोटकर, गिरीश मडावी, अशोक चव्हाण, प्रवीण इंगोले यांच्या पथकाने ही कारवाई केली.

चोरी करण्यापूर्वी अलार्म ब्लॉक
गेल्या गुुरुवारी (31 मे) तरणोळी गावातील टॉवरच्या 24 बॅटर्‍या चोरल्याची कबुली चोरट्यांनी पोलिसांनी केलेल्या चौकशीत दिली. विशेष म्हणजे चोरी करण्यापूर्वी अलार्म ब्लॉक करण्यात यश आलेले होते, त्यामुळे पहिल्या दिवशी अलार्म वाजला नसल्याचेही चोरट्यांनी सांगितले.