गडचिरोली : रस्ता कामाचे प्रमाणपत्र देण्यासाठी 20 हजार रुपयांची लाच मागितल्याप्रकरणी लाचलुचपत प्रतिबंधक विभागाच्या पथकाने सापळा रचून ग्रामसेवकाला रंगेहाथ पकडले. नागसू जित्रू नरोटे, असे अटक केलेल्या ग्रामसेवकाचे नाव आहे.
ते सिरोंचा तालुक्‍यातील कोपेला ग्रामपंचायतीत कार्यरत आहेत. या ग्रामपंचायतीअंतर्गत गावालगत दहन व दफनभूमीकडे जाण्यासाठी सिमेंट कॉंक्रीट रस्त्याचे बांधकाम करण्यात आले. काम पूर्ण झाल्यानंतर संबंधित कंत्राटदाराने ग्रामसेवकाकडे काम पूर्ण झाल्याच्या प्रमाणपत्राची मागणी केली. मात्र, या कामासाठी ग्रामसेवकाने 20 हजार रुपयांची मागणी केली. कंत्राटदाराची लाच देण्याची इच्छा नसल्याने त्यांनी याबाबत लाचलुचपत प्रतिबंधक विभागाकडे तक्रार केली. गुरुवारी (ता. 10) लाचलुचपत प्रतिबंधक पथकाने सापळा रचून ग्रामसेवक नागसू नरोटे यांना रंगेहाथ पकडले. त्याच्या विरोधात सिरोंचा पोलिस ठाण्यात गुन्हा दाखल करण्यात आला.