गडचिरोली : नक्षलवाद्यांनी पुकारलेल्या विलय सप्ताहाला नागरिकांनी विरोध करीत रविवारी (ता.22) बॅनर जाळून घोषणाबाजी केली.
एटापल्ली तालुक्‍यातील पेंढरी ते ढोरगट्टाकडे जाणाऱ्या रस्त्यालगत नक्षलवाद्यांनी लोकांच्या मनात दहशत, वाहतुकीस अडथळा निर्माण करण्याच्या उद्देशाने लाल कापडी बॅनर लावले होते. पेंढरी हद्दीतील नागरिकांनी उत्स्फूर्तपणे एकत्र येऊन ते बॅनर काढून त्याची होळी केली. यावेळी नागरिकांनी नक्षलवाद मुर्दाबादच्या घोषणा दिल्या.
नक्षलवादी निष्पाप आदिवासी नागरिकांचा निर्घृण खून करतात तसेच बॅनरबाजी करून सामान्य नागरिकांचे जनजीवन विस्कळीत करण्याचा प्रयत्न करतात. परंतु, जनतेने नक्षलवाद्यांना चांगल्या प्रकारे ओळखले असून यामुळेच आम्ही नक्षलवाद्यांचा विरोध करत असल्याचे नागरिकांचे म्हणणे आहे.