Adani : विल्मरनंतर अदानींच्या आणखी एका कंपनीचा IPO धडकणार

Adani Capital IPO Update : अदानी समूहाची आणखी एक कंपनी शेअर बाजारात येण्याच्या तयारीत असून, लवकरच अदानी कॅपिटलचा IPO बाजारात येण्याची शक्यता आहे. गौतम अदानी अदानी कॅपिटल आयपीओद्वारे 1500 कोटी रुपये उभारण्याच्या तयारीत आहेत. असे मानले जाते की, कंपनी 2024 च्या सुरुवातीला IPO लाँच करून स्टॉक एक्स्चेंजवर कंपनीला सूचीबद्ध करू शकते.

अदानी कॅपिटल ही एक NBFC

अदानी कॅपिटल ही नॉन-बँकिंग वित्तीय कंपनी आहे. जे 10 टक्के स्टेक विकण्याचा विचार करत आहे. यासह, आयपीओद्वारे 2 बिलियन डॉलरचे मूल्यांकन करण्याचे लक्ष्य आहे. तसेच अदानी कॅपिटलला 30,000 ते 30 लाखांपर्यंतच्या कर्ज वाटपासाठी बाजारपेठ काबीज करण्याची इच्छा आहे. अदानी कॅपिटलची सुरुवात 2017 मध्ये झाली असून, 31 मार्च 2021 रोजी संपलेल्या 2020-21 आर्थिक वर्षात कंपनीचे उत्पन्न 16.3 कोटी रुपये इतके होते.

कंपनीच्या 8 राज्यांमध्ये 154 शाखा असून, कंपनीकडून कर्ज घेणाऱ्यांची संख्या सुमारे 60,000 आहे. अदानी कॅपिटल कृषी उपकरणे, व्यावसायिक वाहने खरेदी करण्यासाठी, व्यवसाय करण्यासाठी कर्ज प्रदान करते. अदानी समूहाच्या 8 कंपन्या बाजारात सूचीबद्ध आहेत. ज्यामध्ये अदानी ट्रान्समिशन, अदानी ग्रीन एनर्जी, अदानी टोटल गॅस, अदानी पॉवर, अदानी पोर्ट्स, अदानी विल्मर आणि अदानी एंटरप्रायझेस आदींचा समावेश आहे. या कंपन्यांनी त्यांच्या गुंतवणूकदारांना मल्टीबॅगर परतावा दिला आहे. त्यानंतर आता गुंतवणूकदार अदानी कॅपिटलच्या आयपीओची आतुरतेने वाट पाहत आहेत.