जीएसटी वसुलीची गाडी पुन्हा रुळावर

नवी दिल्ली - जून महिन्यात जीएसटी वसुलीची (GST Recovery) घसरलेली गाडी पुन्हा रुळावर येण्याची चिन्हे दिसू लागली आहेत. जुलै महिन्यात एक लाख १६ हजार ३९३ कोटी रुपये जीएसटी वसूल झाल्याने केंद्र सरकारला (Central Government) हायसे वाटले आहे. (GST Recovery Central Government)

अर्थ मंत्रालयाने जुलै महिन्यातील जीएसटी वसुली संदर्भात आज जाहीर केलेल्या आकडेवारीनुसार २२ हजार १९७ कोटी रुपये केंद्रीय जीएसटी, २८ हजार ५४१ रुपये राज्य जीएसटी, तर आंतरराज्य मालवाहतुकीवर आकारल्या जाणाऱ्या आयजीएसटी पोटी ५७ हजार ८६४ कोटी रुपये वसूल झाले आहेत. यामध्ये आयात मालावरील आकारल्या गेलेल्या २७ हजार ९०० कोटी रुपये कराचा आणि ७७९० कोटी रुपये उपकरणाचा समावेश आहे.

केंद्र सरकारला मे महिन्यात जीएसटीपोटी १,०२,७०९ कोटी रुपये मिळाले होते. तर एप्रिलमध्ये १,४१,३८४ लाख कोटींची विक्रमी महसूल प्राप्ती झाली होती. त्याआधी मार्चमध्ये १२३९०२ कोटी रुपये, फेब्रुवारीमध्ये १,१३,१४३ कोटी रुपये, जानेवारीमध्ये १,१९,८७५ कोटी रुपये आणि डिसेंबर २०२० मध्ये १,१५,१७४ कोटी रुपये जीएसटी वसुली झाली होती.

जून महिन्यात जीएसटी वसुली मध्ये लक्षणीय घट झाली होती. कोरोना संकटाच्या सर्वत्र असलेल्या लॉकडाउन सदृश परिस्थितीमुळे जून महिन्यात ९२ हजार ८४९ कोटी रुपये एवढेच जीएसटी वसुली झाली. मागील आठ महिन्यांत जीएसटी वसुलीने एक लाख कोटींचा आकडा पार केला असताना जून महिन्यात झालेली घट अस्वस्थता वाढविणारी होती. असे असताना जुलैमधील जीएसटी वसुली अर्थव्यवस्थेतील सुधारणा दर्शविणारी असल्याचेही अर्थ मंत्रालयाचे म्हणणे आहे.