Indian Share Market : सेन्सेक्स 410 अंश घसरला

मुंबई : जागतिक शेअरबाजारांमधील (Share market) प्रतिकूल वातावरणामुळे आज भारतीय शेअरबाजारांमध्ये (Indian share market) आयटी आणि बँकांच्या (banks) समभागांमध्ये नफावसुली झाली. त्यामुळे भारतीय शेअरबाजार निर्देशांक सुमारे पाऊण टक्का घसरले. सेन्सेक्स (Sensex) 410.28 अंश तर निफ्टी (Nifty) 106.50 अंश घसरला. सेन्सेक्स आज साठहजार अंशांच्या पातळीखाली गेला.

आज नफावसुलीच्या जोरामुळे बाजारात चांगल्या उलथापालथी झाल्या. सेन्सेक्सने आज व्यवहारादरम्यान सुमारे बाराशे अंशांचा चढउतार पाहिला. सकाळी बाजाराचे व्यवहार सुरु झाल्यावर सेन्सेक्सने 60,285.89 अंशांचा उच्चांक नोंदवला. मात्र तेथून त्याची घसरण सुरु झाली. दुपारी युरोपीय बाजार घसरणीने उघडल्यावर सेन्सेक्समध्येही नफावसुली सुरु झाली व अडीच वाजण्याच्या सुमारास तो 59,045.53 अंशांपर्यंत म्हणजे उच्चांकापासून बाराशे अंशांपर्यंत खाली घसरला. मात्र तेथे पुन्हा खरेदी सुरु झाल्याने तो सावरला आणि व्यवहार संपताना 59,667.60 अंशांवर बंद झाला. निफ्टीदेखील 17,748.60 अंशांवर स्थिरावला.

आज भारती एअरटेल टक्केवारीच्या हिशोबात सर्वात जास्त घसरून 696 रुपयांवर स्थिरावला. टेक महिंद्र 49 रुपयांनी घसरून 1,414 रुपयांवर आला. बजाज फायनान्स 250 रुपयांनी घसरून 7,544 रुपयांवर तर बजाज फिनसर्व्ह 491 रुपयांनी घसरून 17,547 रुपयांवर आला. एचसीएल टेक (बंद भाव 1,269 रु.), इन्फोसिस (1,687) व टीसीएस (3,779) तसेच इंडसइंड बँक, आयसीआयसीआय बँक, एचडीएफसी, अॅक्सीस बँक, स्टेट बँक, महिंद्र आणि महिंद्र व बजाज ऑटो यांच्या शेअरचे भाव घसरले. तर दुसरीकडे सन फार्मा (779 रु.), डॉ. रेड्डीज लॅब (4,832), रिलायन्स इंडस्ट्रीज (2,548), टाटा स्टील (1,280) या शेअरचे भाव वाढले.

आजचे सोन्याचांदीचे भाव

सोने - 46,040 रु.

चांदी - 60,100 रु.